پلاتفۆرم یارسان: دیرووکمان مەڕنوو، ئمڕووژمان کۆبانی

دیرووکمان مەڕنوو، ئمڕووژمان کۆبانی

خاوەنکار جەژن دیرووکی خەڵق یارسان هەرساڵە وە سەرەتاێ زمسان و گووڕین وەرز لە ڕێیەو ڕەسێد. ئەگەر وەرز وەهار ئەڕاێ ئیمە چاو نووبۊن و ژیانێگ لە سەرەتاوە تیەرێد، وەرز زمسانیش وە سەرما و کرێوە نیشانەێگە لە پاوەگەزداین و هەڵگ و هەڵا ئەڕاێ تێپەڕانن سەختییەیل و دژوارییەیلێگ ک خەڵق ئێمە لە درێژایی دیرووک خوەی وەگەردی دەس وە یەخە بۊە. لە ڕێ ڕەسین زمسان و ساڵ تازەێ یاری چۊ هەمیشە یاێ و هۊرمان دیرووک خەڵقێگ زنە کەێد ک فەلسەفەی وجوودی خوەی لە واوەسە لە وەراێوەر نەهامەتییەیل و پاوەگەزداین لە ڕێگاێ ئازادی هەڵگرتیە. ئەژداد ئیمە و نەسلەیل وەرین ک ئاڵاێ واوەسە و تێکووشان دەس وە دەس وە ئێمە ڕەساننە، لەێوا نووڕستنە ک وە وەڕێەوبردن جەژن یەکگرتن لە ڕووژەیل سەرد زمسان، پەیام واوەسە لە وەراێوەر زوڵم و زوور سەردەم وە ئێمە بڕەسنن و ئەڕاێ ئێمە بۊشن ک واوەسە لە وەڕاێوەر سپاێ چیچەک تا ڕەسین وە ئازادی درێژە دێرێدن. ناو سپاێ چیچەک ئەگەرچە توانێد ئەڕاێ نەسڵ هاوچەرخ ئێمە ناموو بوود، بەڵام وە نووڕستن وە زمسان سەردەم خوەمان دۊنیمن ک شەڕ ناوەین تیەریکی و ڕووشنا هەر بەردەوام بۊە و هازەیل نۊتەکپەرەس و دێودرنجەیل سەردەم وە ناوەیل ترەک هەر خەریک هەڵامات وە ئەرزشتەیل خەڵق ئێمەن تا دەسەڵات خوەیان لە سەر ئیمەێ یارسان بسەپنن. هاوکات دۊنیمن ک واوەسە و تێکووشاێن لە وەراێوەر ئەی تیەریکییە بەردەوام بۊە و وەتایوەت ژنەیل کوومەڵگا وە ڕووح واوەسەێ خاتوو ڕەزبار ڕۆڵ ڕێبەری لە ڕیوارەیل ڕووژنایی و نۊر داشتنە. لە ساڵی ک ویەراندیمن خەڵق ئێمە لە باشوور کوردستان تۊش هەڵاماتەیل پەیەڵپەی بۊ و پاشمەنییەیل داعش و بناژووخوازەیل ترەک –ئەی چیچەکەیل سەردەم- وە هەڵمەت وە خەڵق ئێمە هەم ژیان خەڵق تۊش مەترسی کردن و هەمیش وە هەڵامات وە قەورسانەیل هەوڵ دان هەر نیشانەێگ لە وجوود و شارستانیەت ئێمە لە ناو بوەن. لە ڕووژهەڵات کوردستان و هەر لە سەرەتاێ ساڵ وەرین یاری، خەڵق ئێمە ک ماوەێ فرەێگە تۊش بناژووخوازی حکوومەت سەرمایەداری ئسلامی بیە، سەرهەڵدا و پاوەپاێ خەڵقەیل ترەک ئێران لە وەراێوەر ئەی زڵم و زوورە وسیا و ئەگەرچە حکۆمەت ئێران وە دارودرەوش و گولە و سێدارە و کوومەڵکوش کردنیان لە خیاوانەیل جواو ناڕەزاییەیل دا، وەلێ واوەسە و تێکووشاێن بەردەوام مەن و وە شێوەیل ترەک خوەی نیشان دا.

لەی ساڵێگ ک چی باشوور و باکوور کوردستان بی وە شوون پاوەگەزداین گەورەێگ و جهان وە چەو خوەی حەماسەێ قەندیل سەربەرز و خەڵق پاێارمان دی و ئەگەرچە گشت میدیا و دارودەسەیل دەسەڵاتدار لە جهان سەرمایەداری هەوڵ دان تا ئەی واوەسەێ گەورە ناێدە چەو، وەلی ئەندازەیل ئەی واوەسە و وەتایوەت حەماسەێ هەفتانین ئەوقەرە چەوگیر بۊ ک لە دیرووک هازەیل داگیرکەر چۊ شکستێگ ترەک سەفت بۊ و تەنانەت هێڵ خیانەتیش ک لە گشت ماوەێ شەڕەگە یارمەتی دژمەن دیاد و لە گشت هاز خوەی ئەڕاێ خزمەت کردن وە سپاێ چیچەک سەردەم ئسفادە کردیاد، وە ئەی شکست مل نیا و چشتێگ بجگە چەپەڵ کردن ناوی نەیۊ وە بەشی. لە ئاکام ئەی شکستیش چیچەکییەیل سەردەم و خزمەتکەرەیلیان لە هێڵ خیانەت ئەڕاێ نەهێن کردن شکستیان لە هاوپەیمانی چەپەڵێگ وەگەرد هازەیل ئەمپریالیست پلان خەیانەتێگ ترەک -ئەی کەڕەت لە شنگال- داڕشانن تا دەسکەفتەیل خوێشک و برایل ئیمە لە واوەسە دژ وە داعشییەیل وە چنگیان دەربارن؛ پلانێگ ک شکێگ نەیریمن وە واوەسەێ خەڵق ئێزدی شنگال و هاوپەیمانیێگ دێمۆکراتیک ناوەین خەڵقەیل ئەو ناوچە یەی کەڕەت ترەک شکستێگ ئەڕاێ هازەیل ئەمپریالیست و حکۆمەتەیل ڕەگەزخواز ناوچەێ خوەرهەڵات ناوەڕاست و هەلەێوا خزمەتکارەیلیان ها وە پێەو.

دیرووک ئێمەێ یارسان شایەتی دەێد ک هەرجێگ زوور و زڵم بیە، واوەسە و پاوەگەزداین لە وەراێوەر ستەمیش هاوڕێی بۊە و وەی خاتریش زووردارەیل هەوڵ فرەێگ دانە وەرجە هەر چشتێگ خەون و هۊرشەێ واوەسەکردن لە زەێن خەڵق پاکەو بکەن؛ کارێگ ک هۊچ کاتێگ سەرنیەگرێد و هەر ئەوجوورە ک دۊنیمن واوەسە لە وەراێوەر زڵم و ستەم ڕەژیمەیل ناوچەگە وە تایوەت ڕەژیمەیل ئێران و ترکیە هەر بەردەوام بۊە و بەردەوامیش مینێدن. سەرکەفتن سیستم کۆنفدرالیزم دمۆکراتیک لە ڕۆژاواێ وڵات و سەرمەشق گرتن خەڵق ئێزدی لەی پاوەگەزدانە نیشان دا ک لە کۆبانی تا شنگال چۊزەرەیل ئازادی خەریک پشکەوتنە و هۊرشەێ ژیانێگ ئازاد و سەروەخوە خەڵقەیل خوەرهەڵات ناوەڕاس وە جمشت هاوردیە. لەی زمسانە وە ڕووح واوەسەێ سوڵتان سەهاک و خاتوو ڕەزبار و یارەیلیان هەنگاو وە ساڵ تازەێ یاری نەیمن و وە ڕۊ وەهار ئازادی و ئاگر ژیانەوەێ نەورووز چیمن. لە ساڵ نوو و لەی سەردەم واوەسە لە وەراێوەر زمسان زڵم و زوور، یاێ شەهیدەیلمان کەیمن لە باوەیاێار و تەیموور بانیارانی تا سەید قوربان حوسەینی، مێهرداد شاهمورادی و سەید مەحموود خامووشیان و هەلەێوا شەهیدەیل یارسانێگ جوور سەید خەلیل عالینژاد و کیانووش ئاسا تا هەڤال شاهین داڵاهوو و هەڤاڵ زاگرس بەرزەوان و شەهید پوویا ناسریخا ک لەی ساڵ کۊیەنە لە ئێعترازەیل مانگ ئابان وە دەس ڕژیم ئێران شەهید بۊ.لەێ ساڵ تازەێ یاری سەوەنمان وەگەرد شەهیدەیل نوو کەیمن و سڵام هەنیریمن وە تێکووشاین و واوەسەێ خەڵق یارسان لە کرماشان و لوڕستان تا ئازەربایجان و مازەندەران، و هەلەیوا خەڵق کورد لە هەر چوار پارچەێ وڵات کوردستان و هەلەیوا یەکگرتی بۊن خوەمان وەگەرد تێکووشانەیل خەڵقەیل ناوچەگە لە ڕێگاێ ئازادی و یەکسانی دەربڕیمن و لە سەر ئەی باوەڕیمن ک یەکیەتی دمۆکراتیک و واوەسە و تێکووشاێن، تەنیا ڕێگاێ ئێمە ئەڕاێ ڕەسین وە ژیانێگ ئازادە.

دیرووکمان پاوەگەزدان مەڕنوو
ئمڕووژمان پاوەگەزدان کۆبانێ
خاونکارت پیرووز کوردستانەگەم

پلاتفۆرم یارسان