شەورای وەڕێوەبەری پلاتفۆرم یارسان: لە شوون سێ ساڵ هێمان یەکدەنگی کوومەڵگە لە رووژەیل یەکم، هاز کوومەڵگەس
لە شوون سێ ساڵ هێمان یەکدەنگی کوومەڵگە لە رووژەیل یەکم، هاز کوومەڵگەس
سێ ساڵ لە زەویلەرزەی وە هاز رووژ ٢١ خەزەوڵوەر ساڵ ١٣٩٦ هەتاوی لە پارێزگای کرماشان گوزەریەد ک کوومەڵگەی کورد و ئنساندوسەیل خەمبار کرد، سێ ساڵێگ ک ئەڕا مەردم ناوچەیل زەویلەزەلێ دریای رووژێگیان جوور ساڵێگ گوزەریا و هێمانیش بەشێگیان لە ناو کانکس وە سەر بەن.
زەویلەرزەیگ سروشتی هات و کوومەلگەیگ خەمبار کرد ئەمانگ حەماسەیگ ئنسانی وە رەنگینی رەنگین کەمان لە گشت گەلان و باوەریەگان وەگەرد خوەی هاورد، حەماسەیگ ک تەنانەت ئەڕا کومەک وە مەردم لێ قومیاگ چەن کەس گیانیان وە دەس دان، حەماسەیگ وە شیوەی خوەیوەڕێوەبەری ک دەیان ئەنجومەن و ناوەند مەردمی لە سەرانسەر روژهەڵات کوردستان هاتنە هانای مەردم و لە هاتن کارەساتێگ گەوراتر نواگیری کردن. هانا هاتن و خوەیوەڕێوەبەری کوومەڵگەی کورد لە ناوچەیل زەویلەرزە دریای ئەڕا حاکمیەت توتالیتار هەزم نەوی و لە ئەو دەم هەتا ئێرەنگە وە چەوێگ ئەمنیەتی نووڕێدە ئەو ناوچەیلە و سیستم وەکەراگریای و کونەفکرانە لە ئەوردا پەیرەو کەید.
سێ ساڵ لەو زەویلەرزە گوزەرێد و مەردم هێمان وەگەرد گیچەڵەیل رووژانە ک لە لایەن رژیم فاشیست مەزهەبی ئێران ئەڕایان دورس کریاس دەسوپەنجە دەن و رژیم وە پەی ئەساس و بناخەی ک دژایەتی خەڵق و ئنسانیەتە هەڵس و بنیش کەید، خوەندنگە، ماڵ، پارک، فورسەت کار و … ک بایس حکومەت ئەڕا مەردم دورسێ بکەید هێمان جێ وە جێ نەویە و رووژ لە دۊای رووژ ژیان مەردم سەختر بووت. لە پاڵ ئیانە ک کوومەڵگە رۊوەرۊ زامەتی و مەینەتە، رژیم ها شوون ئاژاوەدورس کردن و دەسمیەت دان هێزەیل تروریستی گرێدریاگ خوەی لە ناوچەگە. نمایەندەیلێگیش ک لە ئەو ناوچەیلە چینەسە مەجلس رژیم هەتا ئێرەنگە دەنگێگ لە کوومەڵگە نەوین و خوەیان وە بەشێگ لە ناوەند و دژبەر کوومەڵگە دۊنن.
ئی جوور هەڵس و بنیشێێگ وە پێمان وێشێ پشتیوان راسەکانی کوومەڵگە، هاز و یەکدەنگی خود مەردمە و تا وەختێگ ک لە پشت یەک بن توانن وە بان گشت گیچەڵ و مەینەتەیل سەر بکەفن.
کەمتەرخەمی و ئقدامەیل فاشیست و کونەفکرانەی رژیم ئێران وە تونی شەرمەزار کەیم و داوا وە کوومەڵگەی خوەمان کەیم وە روح یەکم رووژ ک لە گشت باوەری و نەتەوە شان وە شان یەک ئەڕا سارێژ کردن زام یەکتر لە پال یەک بین و دەرد و خوەشی گشت هاوبەش بی، ئێرەنگەیش هاودەنگی خوەتان درێژە بیەن و لە ئاژاوەگەری و جیاوازی کاریەیل ناو کوومەڵگە ک لە لایەن زهنیەت حاکم ئەنجام گرێ دۊری بگرن، هەر لێوا هاودەردی خوەمان ئەڕا جارێتر وەگەرد مەردم دووارە ئێلام کەیم و وە دڵنیای هاز یەی‌دەنگی و یەی‌رزی کوومەڵگە هێوای سەرکەفتنمانە و وە یەی‌هەڵوێست بیێنمان سەرکەفیمن وە بان زهنیەت و رژیم فاشیست مەزهەبی ئێران
شەورای وەڕێوەبەری پلاتفۆرم یارسان
