پلاتفۆرم یارسان: ئابان هەر بەردەوام بوود

ئابان هەر بەردەوام بوود

پارەکە لە ئەی ڕووژەیلە بۊ کە پەڕەێ خۊناوی ترەکێگ لە دیرووک زامەتکیشەیل کوردستان و خەڵقەیل ترەک ئێران لادەریا. وەدۊاێ سپارشتەیل بانک جهانی وە سەڵاتین ڕەژیم سەرمایەداری ئسلامی ئەڕاێ لاوردن یارانەیل سووتەمەنی و ئنێرژی و فرەتر کردن قیمەت بنزین و پەیرەوی گشت لایەنەێ ڕێبەرەیل ئێران لە “وڵایەت بانک جهانی”، قیمەت بنزین وە ناکاو سێ بەرابەر کریا و خەشم مەردم کردە کوورەێ ئاگر. لە بارودووخێگ ک کوومەڵگا هەمراێ تۊش ئاکامەیل سەرهەڵدان دەی ١٣٩٦ بۊ و بارودووخ ئقتسادی هەر ڕووژ خراوترەو بۊیاتیاد، فرەترکردن وەناکاو قیمەت کاڵاێگ جوور بنزین ک ژیان بەش گەورەێگ لە مەردم زامەتکیش وە پێ وابەستەس، جوور تەقەێگ ئەڕاێ تەمام کردن کار ژیان خەڵق بۊ و نیشان دیاد ک ڕەژیم سەرمایەداری ئسلامی لە ناوڕێگاێ سازگار کردن خوەی وەگەرد سیاسەتەیل سەرمایەداری جهانی نیەگەڕیەێتەو و هەزینەێ ئەی سازگارییشە وە زامەتکیشەیل و کارکەرەیل خەڵقەیل ئێران داسەپنێدن. وەدۊاێ ناڕەزایەتییەیل مەردمی لە لانکەم ١٠٤ شار، ڕەژیم یەی کەڕەت ترەک ئەوسار مزۊرەیل دڕندەێ خوەی کردەوە و لە چەن ڕووژ لەێوا حەمام خۊنێگ خستە ڕێ ک ژمار کوشیاێلی تا ١٥٠٠ کەسیش ئێعلام کریاس و ئەگەرچە وە بێشەرمی کردارەیل خوەی ئنکار کردیا، وەلی لە ئاخر تەنانەت وەزیر ناوخوەێ دەوڵەت دەسەڵاتداریش دان وە کوشیابۊن لانکەم ٢٢٥ کەس دانا. ڕەژیم هەلەێوا ئینترنەت لە گشت وڵات دابڕانی و هەوڵ دا تا وەر بڵاو بۊن وێنە و فیلم لە جنایەتەیلێگ ک لە وەراێوەر چەو گشت لە خیاوانەیل کردیا لە ئاست جهانی بگرێدن. خەڵق کورد لە شار کرماشان و ناوچەیل ترەک ڕووژهەڵات کوردستان لە سەرهەڵدان ئابان ١٣٩٨یش پاوەپاێ خەڵقەیل ترەک وەتایوەت خەڵقەیل لوڕ و بەلووچ و عەرەب دەست وە واوەسەێگ بێ وێنە دا و هەر لە ڕووژەیل سەرەتاێ واوەسەێ خیاوانی، خیاوانەیل شارەیلێگ جوور کرماشان، مەریوان، خورمۆوە، پۆلدۆختەر، سنە، بووکان، ئوورمی و … بۊە ئاراێ شەڕ خیاوانی و خەبات دژ وە هازەیل داگیرکەر و سەرکوتکەر. تەنیا لە شار کرماشان ناو لانکەم ٦٢ شەهید بڵاو کریاس کە خیاوانەیل ئەی شار قارمانە لە ٤ ڕووژ وە خۊن خوەیان ڕەژاندن و یە لە حاڵێگ بۊ کە ئامارەیل ترەک ژمار شەهیدەیل پارێزگاێ کرماشان ٣٢٠ کەس و ژمار دەسوەسەرکریاێل لەی پارێزگا لانکەم ١٦٥٠ کەس ئێعلام کردنە؛ و بایەد جەخت بکریەێد ک ژمار شەهیدەیل خەڵق لە شارەیل ترەک کوردستان و ئێران وەتایوەت لە خووزستان و بەلووچستانیش کەمتر لە یە نەیوە و دڕندەیی و واشیگەری ڕەژیم لە سەرکوتکردن ئێعترازەیل خەڵقەیل و کوشتن ئاشکراێ مەردم وە شێوەیلێگ جوور تەقانن ڕاساێراس گوڵە وە سەر، لە ئاستێگ ئەنجام گیریا ک هەمراێ ناتوانریەێد مۆک میزان لە ژمارەێ کوشیاگان، زامدارەیل و دەسوەسەرکریایل ئەی سەرهەڵدانە دڵنیا بۊمن. هازەیل ئەمنیەتی ڕەژیم سەرمایەداری ئسلامی وەدۊاێ کوومەڵکوژییش دەس لە جنایەت نەکیشان و بڕێگ لە دەستوەسەرکریایل لە ژێر ئەشکەنجە شەهید کردن و ئەڕاێ بڕێ ترەکیش حۆکم قەتل دەوڵەتی یا وە سێدارە داێن دەربڕێن ک ئجراکردن ئەی حۆکمەیلە لەوارەێ «نەوید ئەفکاری» کارکەر و وەرزشکار لە خەڵق لوڕ لە ماوەێ ٢ مانگ مەنی وە ساڵڕووژ سەرهەڵدان ئابان نیشان لە تەق دەو ڕەژیم ئەڕاێ ترسانن و دروس کردن فەزای ترۆر لە ناو توودەیل خەڵق دێرێدن.

سەرەڕاێ ئەی هەمگە و ئەگەرچە لە ساڵێگ ک ویەرد ڕەژیم سەرمایەداری ئسلامی لە گشت هاز و نز خوەی ئەڕاێ ئەمنیەتی کردن فەزاێ کوومەڵگا ئسفادە کرد و قەێران کۆرۆنایش جوور دەرفەتێگ دیرووکی ئەڕاێ ئەوزێنە کردن گۆشار لە سەر کوومەڵگا ئەو کار برد، هەم دوارە نەتوانست ناڕەزایەتییەیل و ئێعترازەیل خەڵق دابنیشنێدن و بێدەنگی و بێجمشتی قەورستانی دڵخواز خوەی دابسەپنێدە کوومەڵگا. سەرەڕاێ گۆشار بێ هەوسار ئقتسادی ک بجگە هەڵساێن قیمەتەیل و بێ ڕەونەقی، وردە وردە قەحتی و نایابی کاڵایلیش وە خەڵق داسەپنێدن، خەڵقەیل ستەم وەێ کریاێ و تووژەیل جووراوجوور چین کارکەر لە ناوچەیل جووراوجوور هەر وە ئێعترازەیل خوەیان ئدامە دانە، و یەی ڕووژ بێ ئێعتساو و ئعێتراز نەنانەسە پێشت سەر، ک ئێعتساوەیل کارکەرەیل هەف تەپە و هەلەێوا ئێعترازەیل خەڵق عەرەب لە خووزستان نیشان لەی بەردەوام بۊنە دێرێدن.

ئیمە جوور پلاتفۆرم یارسان لە یەکەمین ساڵڕووژ سەرهەڵدان زامەتکیشەیل خەڵقەیل لە ئابان ١٣٩٨، یاێ و هۊرمان شەهیدەگان ئەی سەرهەڵدانە بەرز ڕاگریمن و هاوڕێیەتی خوەمان وەگەرد هازەیل خەڵقی و  دموکراسیخواز لە ڕێگاێ خەباتەیل بەرحەق خەڵق دەربڕیمن. وە باوەر ئێمە هۊچ سەرکوتێگ نەتوانستیە و ناتوانێد ئرادەێ خەڵق کورد و خەڵقەیل ئێران لە ڕێگاێ ئازادی و یەکسانی دابشکنێدن و جنایەتەیل ڕەژیم و مزۊرەیلی لە ئاخرا بجگە نەنگ و کنیەتی فرەتر ئەڕاێ دەسەڵاتدارەیلی ئاکامێگ ترەک نەیرێدن. هەرلەێوا ئاکام کار هازەیل وابەستە و شەڕخواز ک ئەڕاێ وابەستەکردن خەباتەیل خەڵق وە هازەیل جهانی یا ئنکارکردن دموکراسیخوازی هەوڵ دەن و توان وە ئالترناتیڤ-تاشینەیل پاشکەفتنخوازانە، ئەشراف سالاری و حکوومەتەیل خانەدانی کۊیەنە زنەوە بکەن، چشتێگ بجگە داگیرکردن خەباتەیل خەڵقەیل ئێران لە پیناو بەرژەوەندی هازەیل خەڵق و وەلاری بردن خەباتیان نیەزانیمن، و ڕێکخستن دموکراتیک و خوار-وە-بان خەڵقی جوور تەنیا ڕێگاێ چارە ئەڕاێ بەردەوام بۊن تێکووشانەیل زانیمن. ئابان ٩٨ ئاستێگ لە خەبات خەڵقەیل ئێران نیشان دا ک پێوێست بۊن ڕێکخستن سەروەخوەێ هازەیل خەباتکەر فرەتر ئاشکرا کرد و درێژە پەیداکردن ناڕەزاییەیلیش نیشان دا ک تووپ و تانک و کوشتن و شکەنجە دەرەقەت کپ کردن دەنگ خەڵق نەیرێد و ناتوانێدن ڕێگاێ خەبات خەڵقەیل بەن بارێدن. جێ باوەرگومانی نییە ک سەرکەفتن خەباتەیل و بەردەوام بۊن ڕێگاێ شەهیدەیل سەرهەڵدان ئابان –«پوویا ناسریخا»یل و «بورهان مەسۊرینیا»یل- تەنیا وە یەکەوگرتنێگ دموکراتیک لە نێوان زامەتکیشەیل لە گشت خەڵقەیل ئێران وە ئاکام ڕەسێدن.

پلاتفۆرم یارسان
٢٥ ئابان ١٣٩٩