پلاتفۆرم یارسان: پەیام ١٦ ئازەر، واوەسە لە ڕێەگەی ئازادی و یەکسانییە

پەیام ١٦ ئازەر، واوەسە لە ڕێەگەی ئازادی و یەکسانییە

شانزەێ ئازەر لە دیرووک خەڵقەیل ئێران نمادێگ لە ئازادیخوازی و خەبات وەگەرد دیکتاتۆری ناوەکی و ئەمپریالیزم دەرەکی بیە و هەرساڵە گرووهەیل خوەندەوان ئەڕاێ ڕێزگرتن لە ئارمانجەیل دمۆکراتیک و یەکسانیخوازانەێگ ک شانزەێ ئازەر چەوهاوەریانە، دەس دانەسە ئێعتراز دژ وە حکۆمەتەیل زڵم و جەور سەردەم. حکۆمەت هەرساڵە لەلاێگ هەوڵ داس تا وە تەحریف ئارمانجەیل شانزەێ ئازەر، ئەی ڕووژە بکەێدە دەرفەتێگ ئەڕاێ جوولانەوەێ دارودەسەیل مزۊر خوەێ لە زانستگا و وەناڕەوا ئسفادە لەێ ڕووژە بکەێد، و لەلاێ ترەکیش وە بەسیج کردن مەزرینگەیل سەرکوتکەر و ئەمنیەتی دەس وە زندانی کردن و سەرکوت خوەندەوانەیل تێکووشەر داس. ئەمانگ ئمساڵ شانزەێ ئازەر لە حاڵێگ هاتیە ک حکۆمەت وە بوونەێ ناخوەشی کۆرۆنا زانستگایل و مەزرینگەیل پەروەدەێ واڵا تاتیل کردیە و ئەی قەیرانە جوور دەرفەتێگ ئەڕاێ کپ کردن دەنگ حەقخوازانەێ خوەندەوانەیل و دانیشاندن ئێعترازەیلیان زانستیە. یە لە حاڵێگە ک زندانەیل و بازداشتگایل تاتیل نین و تەنانەت لە قەرەنتینەێ شارەیلیش دەسوەسەرکردن و زندانی کردن خوەندەوانەیل بەردەوام بیە.

لە ساڵەیل دۊایی، وە تایوەت لە سەرهەڵدان مانگ دەی ١٣٩٦ وەێ لا، جمشت خوەندەوانی جوور بەشێگ تایبەت لە کوومەڵگا ڕەخنەیل ڕادیکالێگ لە حکۆمەت کردیە و هەوڵ داس تا سیاسەتەیل ئقتسادی-کوومەڵایەتی ڕەژیم سەرمایەداری ئسلامی وە چاڵشت بکیشێد و گرینگترین کێشەیل تووژەیل زامەتکیش و چین کارکەر ک لە حکۆمەت کوومار ئسلامی لە سەرکوت و خەفەقان پەتی ژیەن، وە زوان بارێد و هاوار بکەێد. لە سەردێڕ ئەی کێشەیل، ئێعتراز وە پۊلی کردن زانستگایل، وەکاڵا کردن پەروەردە، قێخەکردن وروود کەمینەیل دینی وە زانستگایل، دوچەوەکی جنسیەتی دژ وە ژنەیل، سەرکوت سیستماتیک کارکەرەیل و بێبەش کردن خوەندەوانەیل ئازادیخواز لە دەرس خوەندن بیە ک وە هاودەنگی و هاوڕایی وەگەرد جمشتەیل کوومەڵایەتی ترەک جوور ژنان، موعەلەمەیل، بازنشەستەیل و گرینگتر لە گشتیان جمشت کارکەری بیە و ناوەڕووک جمشت خوەندەوانی تێکووشەر و ئازادیخواز هاوردیەسە دی.

ئێمە جوور پلاتفۆرم یارسان وە بوونەێ شانزەێ ئازەر وە تێکووشانەیل خوەندەوانەیل ئێران – لە خەڵقەیل و ناوچەیل جووراوجوور- سڵام ناریمن و ئەی ڕووژە وە خوەندەوانەیل ئێران وە تایوەت خوەندەوانەیل زندانی ک وە خاتر چالاکییەیل ئازادیخوازانە لە زندانەیل ڕەژیم سەرمایەداری ئسلامی وە سەر بەن، و گشت کەسەیلێگ ک وە خاتر باوەڕەیلیان یا ئەندامێتی لە کوومەڵگایلێگ جوور یارسان، دەوریشەیل، بەهاییەت و …، یا وە خاتر نایەکسانی و مەوداێ تەبەقاتی نەتوانستنە دەرس بخوەنن، پیرووزبایی کەیمن. لە ساڵڕووژ شەهیدبۊن سێ خوەندەوان تێکووشەر سۆسیالیست، یاێ و هۊرمان گشت خوەندەوانەیل شەهید وە تایوەت شەهیدەیل خوەندەوان زانستگاێ کرماشان، هەڤالەیل شەهید «سەعید عەقیقی»، «عەباسعەلی تەقیپووڕ»، «بێهڕووز هاشمی»، «وریا مودەڕسی»، و هەلەێوا شەهیدەیل خوەندەوان جمشت ئازادیخوازانەێ ساڵەیل وەرین وەتایوەت هەڤالەیل «هاوار کەڵهوڕ»، «مانی کیاکسار» و «عاکف مامۆ زاگرۆس» بەرز ڕاگریمن و ئارمانجەیل سۊر ئەوان جوور ئارمانج خوەمان زانیمن؛ ئارمانجێگ ک تەنیا ڕێەگەێ ڕزگاری و ڕەسین وە ئازادی و یەکسانی لە بارودووخ سەرکوت گشت لایەنەێ کوومەڵگا، واوەسە کردن وە بنەماێ یەکگرتن دمۆکراتیک خەڵقەیل و زامەتکیشەیل زانێدن.

پلاتفۆرم یارسان