پلاتفۆرم یارسان: ئارمانجەیل ئنقلاوی خەڵق، تەنیا وە یەکگرتن دمۆکراتیک وە دەس کەفێدن

ئارمانجەیل ئنقلاوی خەڵق، تەنیا وە یەکگرتن دمۆکراتیک وە دەس کەفێدن

ئیرەنگە چل و دو ساڵ لەو ڕووژەیلێگ ویەرێد ک خەڵقەیل ئێران یەکەو گرتن و دژ وە دیکتاتوری ڕەژیم پەهلەوی شووڕشت کردن و هەڵگ دان تا یەی دەنگ و هاودڵ وە هەزاران ساڵ دەسەڵات نزام میراتی و بی کەمایەتی پاشایەتی کووتایی بێەن. لەو ڕووژەیل ئاگر و خۊن، ڕووڵەیل خەڵقەیل دلێر ئەی وڵاتە وە دۊاێ هەزاران ساڵ زڵم و جەور پاتشایل و حکوومەتەیل بێ کەمایەتی سەر هێز دان و وە پێشکەش کردن گیان خوەیان لە وەراێوەر ئەی نزام ستەمکەرانە خوەڕاگری کردن و لە یەکسانیخوازی و ئازادیخوازی فەریاێ کردن. لەو جمشت دیرووکیە، خەڵقەیل ئێران دژ وە نزام خانێتی و دەربەگایەتی، دژ وە نزام ئستبداد بێ کەمایەتی پاشایەتی، دژ وە نایەکسانی جنسیەتی، دژ وە دەسەڵات تەبەقەێ سەرمایەدار، دژ وە ستەم نەتەوەیی و ئستێعمار ناوەکی، و لە ئاکام دژ وە دەسەڵات ئەمپریالیزم جهانی وە گشت ناوچەێ خوەرهەڵات ناوەڕاس هاوار کردن و هەڵگ دان تا وە خۊن و گیان خوەیان بنەماێ ژیان نووێگ دابمەزرنن. لەو سەردەمە پاتشاێ دیکتاتۆر ئێران محەممەدڕزا پەهلەوی ک دەسکەفتەیل شووڕشت مەشرووتە لە ناو بردۊ و حکوومەت ئستبدادی بێ کەمایەتیێگ وە دی هاوردۊ، و وە پشتیوانی ئەمپریالیزم کەفتۊە ناو ڕەوت میلیتاریزە کردن هاز سیاسی، جوور گشت دیکتاتۆرەیل نەتواست و نەتۊیەنست ک لە وەخت خوەی پەیام شووڕشت خەڵقەیل ئێران بژنەوێ؛ و تەنانەت وەگەرد هازەیل دژەئنقلاو ترەک وەدۊاێ ئاگاداربون لە یە ک ڕەوت شووڕشت دی هەوگل نیەکەێد، ئەڕاێ پەیرەوی لە فەرمانەیل پشتیوانەیل ئەمپریالیست خوەی لەباوەت حەوەجە وە سەر کار هاتن «یەی دیکتاتۆری دژە سۆسیالیستی ترەک» هەڵگ خوەی دا. وە هەر ڕۊ یە هازەیل دەرەکی و ئجراکەرەیل بنەکی سیاسەتەیل ئەوانە بۊن ک ڕێبەری دژە ئنقلاوی ڕووحانییەیل شیعە داسەپاننە سەر جمشت ئازادیخوازانەێ خەڵقەیل ئێران و لە هاوکووکی وەگەرد یەک جمشت شووڕشگورانەێ خەڵقەیل ئێران هەڵەوگەڕانین. هەر ئەی هازەیل پاشکەفتنخواز وە ڕێبەری سەرمایەداری ئسلامی لە پلەێ پاشین و پاش لە داگیرکردن هاز، هەڵگ خوەیان دان ک جمشت واوەسەێ خەڵقەیل لە کوردستان، تورکمەن سارا، بەلووچستان و خووزستان لە ناو بوەن و هاوکات وە ئەی ناوچەیلە لە ناوچەیل ترەک ئێرانیش سێدارەیل هەڵ کردن و لەووا حەمام خۊنێگ خستنە ڕێ ک تەنانەت لە سەردەم دیکتاتۆری پەهلەویش وێنەێ نەدۊنریایۊ.

سەرەڕاێ ئەی سەرکوت و خۊنڕشانن و سەقام گرتن حکوومەت فاشیستی، خەڵقەیل ئەی سەرزەوی درێژە وە واوەسەێ خوەیان دان و وەدۊاێ چوار دەهە لە دەسەڵات گرتن حکوومەت هەمیشە لە قەێران کوومار ئسلامی، تەنانەت ئەڕاێ یەی ڕووژیش دەس لە واوەسە نەکیشان و هەڵگ خوەیان ئەڕاێ پەیگیری ئارمانجەیل دیرووکی خوەیان بەردەوام کردن؛ ک دۊاهەمین نموونەێ هانە واوەسەێگ لە خرووش مانگەیل دەی ١٣٩٦ و ئابان ١٣٩٨ وە چەو دیمن ک لە فرەتر لە ١٥٠ شار خەڵق ڕەنجکیشیاێ هاوردە ناو مەیدان تێکووشاێن دژ وە دیکتاتۆری حکوومەت سەرمایەداری ئسلامی.

ئەی سەرهەڵدانەیلە لە حالێگ قوومیا ک لە ساڵەیل دۊایی شایەتی فرەتر بۊن چەوگر ناکووکی لە پەیوەندییەیل کوومەڵایەتی، ئقتسادی و سیاسی بۊمنە؛ ناکووکیێک ک وە ڕۊداێن ساڵانە چەن دە هزار مانگرتن و کووبۊنەوەێ ئێعترازی لەلایەن کارکەرەیل، موعەلمەیل، پەرەستارەیل و بازنشەستەیل توانیم فامی بکەیمن و ڕۆخسارەیل ترەکی لە واوەسەێ ژنەیل دژ وە باوک سالاری و قانوونەیل پاشکەفتنخوازانەێ ڕێکخریاێ لەلایەن ڕەژیم، خەبات زەحمەتکیشەیل دژ وە بەهرەکیشی و هەژاری و نەداری، خەبات خوەندەوانەیل و ڕووشنهۊرەیل دژ وە ئستبداد و سانسور و هەناسەبڕی، و خەبات خەڵقەیل ستەملێکریاێ جوور خەڵق کورد، بەلووچ، عەرەب، لوڕ، تورکەمەن، تورک و جماتەیل مەزەوی ستەملێکریاێ لە پاشکەفتنخوازی مەزەوی دیارە.

لەی ناوەینە خەڵق یارسان لە شوونەیل جیاجیاێ ئەی جوغرافیا هەمیشە بەشێگ لەی خەباتەیل ئازادیخوازانە بۊە و جور گرووهێگ کوومەڵایەتی ک بەرژەوەندی خوەی لە گرەو سیستەمێگ دمۆکراتیک، ئازادیخواز و پێشکەفتنخواز دۊنێ، هەمیشە هەڵگ دەێد تا هاوڕاێ پشتیوانی لە جمشتەیل ئازادیخوازانە و دمۆکراتیک، خوەی لە پێناو هانە ئارمانجەیلێگ ڕێکخستن بکەێد. جمشتەیل ئازادیخوازانەێ خەڵق یارسان لە ساڵەیل وەرین ڕۆخسارەێ ئاشکراێگ لە واوەسەێ خەڵق ئیمە وەتایوەت لە کوردستان بۊە و نیشان لەوە دێرێد ک بار سەنگین گوشار و سەرکوت ڕەژیم سەرمایەداری ئسلامی وە سەرشان ئەی مەردم بێ کاردانەوە نەیوە و هەمیشە وە پاشخوان و کاردانەوە لە لایەن مەردم هاوڕێ بۊە. ئەگەر هازەیل پاشکەفتنخواز ئەی ڕەژیم گوساخی کردنە و وە پەیرەوان دین یاری سووکایەتی کردنە و کوومار ئسلامی هەڵگ داس تا وە ڕەوشەیل جووراوجوور باوەڕەیل و هۊرشەیل خەڵق یارسان ئنکار بکەێد یا چۊ تاوان بزانێد، واوەسە و خوەڕاگری  یاران ئیمەیش بەشێگ ترەک لە ڕاسیەتی هاوردیەسە دی و بائس ئەوزێنەکردن ئاگاداری لەناو توودەیل مەردم بۊە. هەر وەو شێوە گوساخی دۊایی هازەیل پاشکەفتنخواز کوومار ئسلامی و سووکایەتی کردن وە یەکێگ لە یاران کوومەڵگاێ یارسان لە شار ساوەیش بێ شک جواو خوەی لە چوارچووەێ تێکووشانەیل ئازادیخوازانە و دمۆکراتیک خەڵق یارسان گرێد و وە شوور ئنقلاوی ڕووڵەیل ئەی خەڵق ئەڕاێ ڕێکخستن فرەتر خوەیان دامەن دەێد.

ئیرەنگە ک چل و دو ساڵ لەو ڕووژەیل ئاگر و خۊن ویەریاگە و دۊنیمن ک چۊ لە ناونکی لەێوا بارودووخ خەمناکێگ کەسایەتییەل پاشکەفتنخواز و وابەستە گشت هەڵگیان دەن تا هەر جوورێگ لە خوازیاری ئەڕاێ گوووڕانکاری ئنقلاوی لە زەێن خەڵقمان پاکتاویەو بکەن، یەی کەڕەت ترەک لە سەر ئارمانجەیل تێکووشەرەیل ئازادیخواز و شووڕشگەر جەخت کەیمن؛ ئارمانجەیلێگ ک هەرچەن لە سایەر پشتیوانی ئاشکرا و نەهینی ئەمپریالیستی لە پاشکەفتنخوازەیل وەڕواڵەت نەڕەسیەسە ئەنجام، وەلێ جێ خوەی لە دڵ خەڵق ڕەنجکیشیاێ ئیمە پەێا کردیە و لە ئەوپەڕ ئاسووێ سیاسی و کوومەڵایەتی ئەی مەردمە لا نیەچوودن؛ و شکێگ نییە ک ڕووڵەیل ئەو نەسڵێگ ک وە هزاران ساڵ حکوومەت پاشایەتی کووتایی دان، دیر یا زۊ دەم و دەسگاێ حکوومەت پاشکەفتنخواز سەرمایەداری ئسلامی و دیکتاتۆری مەزەویش خاپوور کەن و بنچینەێ ژیانێگ ئازاد و دمۆکراتیک، ئازاد و یەکسان دامەزرنن. لەی سەردەم دیرووکی یاێ و هۊرمان گشت ژنەیل و پیاوەیلێگ ک لە ڕێیەگەێ ئارمانج ئازادی و یەکسانی تێکووشان، گشت ڕێوارەیل ڕێیەگەێ سۆسیالیزم و دمۆکراسی ڕادیکال –وەتایوەت گیانباختکردییەیل ئەی ڕێیەگە و هەلەێوا زندانییەیل سیاسی- بەرز ڕاگریمن و پەیمانمان وەگەرد ئارمانجەیل شەهیدەیل خەڵقمان لە سەراێسەر ئەی جوغرافیا لە کوردستان و ئازەربایجان تا مازەندەران و قەزوین و لوڕستان دووپاتە کەیمن؛ لە شەهیدەیلێگ جوور خەسرەو پەناهی تووشامی، سۆهراب غوڵامی، سەید قوربان حوسەینی، کاکی حەسەن مەقسوودی و ئێرج بووزەرجومێهری ک ئاڵاێ واوەسە و فداکاری لە ڕێیەگەێ ڕەسین وە ئارمانجەیل ئنقلاوی هەڵ کردن، تا هەڤالەیل شەهیدێگ جوور زاگروس بەرزەوان، شاهین داڵاهوو و سمکۆ داڵاهوو و هەلەێوا شەهیدەیلێگ جوور کیانووش ئاسا و پوویا ناسریخا ک وە پێشکەش کردن گیان خوەیان نەهیشتن ئەی ئاڵا وە زەوی بکەفێ. شکێگ نییە ک ئارمانجەیل ئنقلاوی ک خەڵق ئیمە ئەڕاێ تێکووشاس مەگەر وە یەکگرتن و یەکێتی دمۆکراتیک وە دەس نیەکەفێد و وە دەس هاوردنیان لە گرەو کووبۊن لە دەور و گرد هێڵ ئنقلاوی و خەباتکەرێگە.

پلاتفۆرم یارسان
ڕێبەندان ١٣٩٩