پلاتفۆرم یارسان: شەهیدان «زاگرۆس مانی» و «شەوگەر چیا» هسارەگان سۊر ترەک لە کەشکەشان تێکووشانەیل خەلق ئێمەن
شەهیدان «زاگرۆس مانی» و «شەوگەر چیا» هسارەگان سۊر ترەک لە کەشکەشان تێکووشانەیل خەلق ئێمەن
ڕەژیم ئستێعمارکەر و داگیرکەر کوومار ئسلامی ئێران یەی جار ترەک لە پیلانگێڕی چەپەڵێگ ڕۊچەێ نامرووڤانە و بێ ئەخلاق خوەی ئاشکرا کرد و دەس وە کوشتار جەوانەیل شووڕشگەر کوردستان دا. جنایەتکارەیل ڕەژیم ئەی کەڕەت هەوڵ دان تا وە شیوەێگ ناکەسانە دو هسارەێ سۊر بارنە خوار، تا وە خیاڵ پۊچەڵ خوەیان لە ڕێیەگەێ شووڕشت خەڵقەیل گێچەڵێگ بارنە دی؛ وەلێ لەیە ئاگادار نین ک هەر شەهید هەچۊ هسارەێگ سۊر وە ڕێیەگەی شووڕشت خەڵقەیل پرشە وەشنێدن و وە بەختکردن گیان خوەی رێیەگەی ڕەسین وە ژیانێگ ئازاد نۊرانییەو کەێدن.
وە پایەێ هەواڵەگانێگ ک لە ڕووژەیل دۊایی بڵاو کریاسە، شەهیدان «زاگرۆس مانی» و «شەوگەر چیا» ڕووژ ١۶ مانگ بێهمەن ١٣٩٩ لە ناوچەێ چەم شلێر لە نزیکی شار پێنجوێن لە باشوور کوردستان لە دەسیسەێ خوەفرووشەیل ڕەژیم داگیرکەر ئێران لە پساێ ئەرکەیل شووڕشگێڕانەیان ئەنجام دیان، وە شێوەێگ دڕندانە و دۊر لە مرووڤایەتی شەهید کریانە.
هەڤال شووڕشوان «مەهدی ڕەزایی» وە ناو شۆڕشوانی «زاگرۆس مانی» لە شار کرماشان لە بنەماڵەێگ نیشتمانپەروەر لە کوومەڵگاێ یارسان لە داڵگ پێیا بۊ. ئەو لە شار کرماشان لە کوومەڵگاێگ قەێران لێدریاگ و ژێر ستەم و سەرکوت، ئەمانگ هەمیشە خوەڕاگر و تێکووشەر گەورە بۊ. ئەو لە ساڵەیل جەوانی وە نووڕستن ستەم ئاشکراێ چینایەتی، نەتەوایەتی و جنسیەتی لە کوومەڵگاێ کرماشان نوون وە ماهیەت چینایەتی و ئستێعماری ڕەژیم سەرمایەداری ئسلامی برد و تەسمیم وە واوەسە و تێکووشاێن لە وەراێوەر نایەکسانی و خەفەقان گرت. ئەو وە گشت هاز و توانی هەوڵ دا تا ئەرزشەیل شووڕشگەرانە لە کەسایەتی خوەی بپەروەرنێد و لە وەراێوەر سەرکوتێگ ک وە کوڵ کوومەڵگاێ کورد کرماشان کریەێد دەس وە واوەسە بیەێد. هەڤال زاگروس خوەسازی شووڕشگەرانە وە ئاشنا بۊن وە ئەندێشەیل هازەیل سۆسیالیست و شووڕشوانەیل مارکسیست دەسپێکرد و وەدۊاێ ئاشنا بۊن وە ئەندێشەێ شووڕشگەرانەێ رێبەر عەبدوڵڵا ئۆجەلان تەسمیم گرت وە ڕزەیل شووڕش کوردستان بپەیوەنێد و لە ڕێیەگەێ دامەزراندن سیستەم دمۆکراتیک ڕادیکال چۊ بەرد بنچینەێ کوومەڵگاێ سۆسیالیستی، و لە پاڵ ئەو سڕانن ستەم نەتەوەیی لە ڕێیەگەی تەبدیل کردن کورد ئازاد وە شووناس نووێگ ئەڕاێ خوەرهەڵات ناوێن هەنگاو هەڵبگرێدن. ئەو لە نزیکەێ هەفت ساڵ چالاکی خوەی لە پارت ژیان ئازاد کوردستان لە وەراێوەر ڕەژیم سەرمایەداری ئسلامی دەست وە تێکووشان دا و وە پاڵ خستن وە ئیدهیل شووڕشگەرانە و سازەندە وە بنەماێ سۆسیالیسم دمۆکراتیک لە وەهازترکردن وەرەگاێ تئۆریک شووڕش لە ڕووژهەڵات کوردستان هەوڵ دا. ئەو وەی مەبەستە تەمەرکۆز چالاکییەیل خوەی لە بەش چاپەمەنی و میدیاێ پارت ژیان ئازاد کوردستان (پژاک) هیشت و وە هەوڵێگ شووڕشگەرانە وە شوون ئەوڕەسین و شیکردن و مارفی کردن تئۆرییەیل شووڕشگەرانە وە تایوەت ئەندێشەیل شووڕشگەرانەێ رێبەر ئاپۆ بۊ و لەی پێناوە ئەرک وەڕێیەوبردن بەش میدیاێ پژاک گردە مل. هەڤال زاگروس مانی میرات واوەسەێ دیرووکی خەڵق کورد و یارسان لە کەسایەتی خوەی زنەوە کرد و وە پەیوەستن وە واوەسەێ خەڵق کورد لە کۊیەسانەیل ئازاد وە پرسیار “چە بایەد بکرێ” پاشخوانێگ شیاێ کێشەیل زەمانە و ناوچەێ خوەی دا. ئەو تایبەتمەندییەیل ئەخلاقی و کرداری کەسێگ شووڕشوان لە خوەی نیشان دا و وە خاکساری، ڕاسویشی، خوەڕاگری، پێشتکار و پەیگیربۊن خوەی ئێحترام کەسەیل ترەک جەلب کرد، و لە کردارەو لە ئەرکەیل خوەی لەێوا سەرسەختی و پەیمانداری لە خوەی نیشان دا ک بائس ترس ڕژیم سەرمایەداری ئسلامی بۊ. هەڵسان و ئاگاداری ڕووڵەیل خەڵق کورد وە تایوەت لە کرماشان ئەوقەرە ئەڕای ڕەژیم گران بۊ ک فەرمان کوشتن و ترۆر هەڤالەیل «زاگرۆس مانی» و «شەوگەر چیا» وە مزۊرەیل خوەێفرووش خوەی دەربڕی و لە ئاکاما وە شێوەێگ دڵتەزن و دۊر لە هەرجوور پابەنبۊن وە ئەخلاق ئەی دو ڕووڵەێ دلێر خەڵق شەهید کردن.
ئەگەرچە ڕەژیم و مزۊرەیلی ئەی خیاڵ کاڵە لە سەر پەروەرنن ک وە سڕانن فیزیکی و کوشتار توانن دەسەڵات نامەشرووع خووەیان پارێز کەن و ئستێعمار و داگیرکەری خوەیان بەردەوامەو بکەن، ئەمانگ وە چەوخستنێگ وە دیرووک وە دڵنیایی توانیم بۊشیمن ک خۊن شەهیدەیل ئازادی چشتێگ بجگە نەنگ و بەدنامی ئەڕاێ ڕەژیمەیل داگیرکەر و جنایەتکار هاوڕێ خوەی ناوردیە. جێ باوەرگەمانی نییە ک تێکووشەرەیل و شووڕشوانەیل لە کوردستان و لە هەر شوون ترەک جهان وە هۊر خستن ناو شەهیدەیل ئرادەێ سەختتری ئەڕای درێژەداێن وە تێکووشان زاگروسەیل و شەوگەرەیل پەیدا کەن و ڕێیەگەی ڕەسین وە ئازادی و یەکسانی وە چنگ خستن وە ئەی هسارەیلە تا لەناوبردن گشت لەونەیل ستەم و نایەکسانی پەیماێن.
ئێمە چۊ پلاتفۆرم یارسان جاویدان بۊن ئەی دو هەڤال فەدایی وە خەڵق کورد و خلقەیل سەرکوت کریاێ ترەک خوەرهەڵات ناوێن، کوومەڵگاێ تێکووشەر یارسان، بنەماڵەێ ئەوان و شەهیدەیل ترەک ئازادی، گەریلایل فەدایی خەڵق و گشت ئازادیخوازەیل و یەکسانی خوازەیل «سەرسەڵامەتی» ئۊشیمن. ئیرەنگە ک لە هڤدەمین ساڵڕووژ دامەزرانن پارت ژیان ئازاد کوردستان و هەڵهاتن خوەر خەبات لە خوەرهەڵات کوردستانیمن، یاێ و هۊرمان هەڤالەیل شەهیدێگ جوور فەرهاد کرماشان، هاوار کەڵهوڕ، شاهین داڵاهوو، زاگروس بەرزەوان، سمکۆ داڵاهوو، سەربەرز کرماشان بەرز ڕاگریمن و وە یاێ و هۊرمان ئەوانە پەیمان بەسیمن ک لە ڕێیەگەێ حەقیقەت بەخشین وە ئارمانەیلیان هەوڵ بیەیمن. هەڤالەیل شەهید ئێمە ئۆلگووەیل زنەێگ لە تێکووشاێن و پایاری مینن و تێکووشانەیل خەڵق و هازەیل شووڕشوان وە چنگ خستن وە ئارمانەیل شەهیدەیل سەخت تر و قورس تر لە ویەردە درێژە پەیدا کەێد. ئەو چشتێگ ک وە جێ مینێدن، ڕێیەگەێ تێکووشاێن و شووڕش دمۆکراتیک خەڵقەیلە ک ناو و ئارمانەیل هەڤالەیل ئێمە ئەڕاێ هەمیشە نۊر وەپێ خەێدن.
پلاتفۆرم یارسان
2021/04/05
