کووبینەوەی دو لایەن یارسانی یاری کورد و پلاتفۆرم یارسان
کووبینەوەی دو لایەن یارسانی یاری کورد و پلاتفۆرم یارسان
دۊیەکە یەیشەمە ٠٧ نوڤامبر وەرانوەر وە ١٦ خەزەڵوەر، دو لایەن یارسانی وە ناوەیل یاری کورد و پلاتفۆرم یارسان کووبینەوەیگ هاوبەش وەڕێوە بردن و لە سەر رەوش کوومەلگەی یارسان، هاودەنگی لایەنەیل و کوومەڵگا و کار هاوبەش گوفتگو ئەنجام دان.
لە کۆبینەوەگە فرەتر جەخت لە سەر هاودەنگی و یەی رێزی و تەسیرێ لە ناو کوومەڵگا و گەشەکردن چالاکی لە کوومەڵگەی یارسان کریا و وەتریا: ئەوەیگە ئیمە هاودەنگ بیمن توانیم کار فرە گەوراتر ئەنجام بیەیم، وە دڵنیایی وە هاودەنگ بیێنمان توانیم کارەیلێگ بکەیم ک خوەمانیش باوەرێ ناکەیم و بێ وێنە بووت. توانیم بۊشیمن وە مدوو شانس یا رەوش ستراتژیک ناوچەگە، پاوەگەزدان کوومەلگە و مدووەیل ترەگ بیە، هەتا ئێرەنگە سەرپا مەندیمنە.
لە ئی بارە هەمیش هاوریا زوان ک ئەیەر بنووڕیمنە دیرووک دۊنیمن ک لە سەر کەمینەگان وە وەردەوامی هێرش ئەنجام گردیە و نمونەی وەرچەو شنگالە و لە ئی چوارچوە یارسانیش وە جوور کەمینەیگ رۊوەرۊ هێرشێگ گشت لایەنەس و ئاسیب پەزیرتەرینە، ئیەیشە لە رۊداوەیل ماوەی وەرین دیمنەسەی و بڕێگ رۊداویش رۊداس و خەتەر لە کەمینە. لە راسیە هاودەنگی و ئتحاد لە نان شەو ئەڕا کوومەڵگە واجبترە.
له درێژەی دیدارەگە باس وە هەنگاو هەڵگردن کرداری و رووڵ بەشەیل جیای کوومەڵگە کریا و وەتریا: ئیە دەسپێگ هەنگاو هەڵگردن کرداری ئەڕا هاودەنگی لە بانانە ک وە دڵنیایی گرنگی تایوەت خوەی دێرێ و توانێ بوودە بناخەیگ خاس. لە ناو کوومەلگەی خوەمان رووڵ ژن و جوان پشت گوش خریاس ک بایس جەخت وە سەرێ بکەیم. هەرلەیوا بایس جەخت وە سەر پەروەردە بکەیم ک هان کوومەڵگەی خوەمان لە سەر بنەوا و چوارجوەی باوەری و کلتور خوەمان و وە ئەو رەنگە خوەمان وە کوومەڵگەییەل ترەگ بناسینیمن، لە راسیە ئیمە جوور لایەنەیلێگ ک لە دەیشتیم دەسمان وازترە و ئی کاریشە وە دەسمان تێ.
هەرلەیوا باس وە ئەوە کریا ک هاودەنگی و یەکیەتی خاڵ گرنگێگە ئەمانگ ئیمە چۊ توانیم لە شوونەیل جیاجیا کار هاوبەش ئەنجام بیەیم و لە ئی چوارچوە ئشارە وە خاڵ هاوبەشێگ ک دێریمن ئەویش یارسانی بینمانە کریا، ئیمە خاون وژدان و ئەرکێگیمن ک بایس ئەڕا کوومەڵگەی خوەمان هەڵێبگریمن پەس گرنگ و بایستەس لە چوارچوەی یاری و یارسان، لایەن و سازمان خوەمان داشتۊمن.
لە بارەی ئەرک و رەوش چالاکەیل و لایەنەیل هاوریا زوان ک ئیمە جوور چالاکەیل و لایەنەیل یارسانی بایس کەمێگ دۊربین بیمن و وەگەرد کەسەیل ترەگ ک لە چوارچوەی ترەگ کار و چالاکی کەن جیاواز بیمن و خوەمان موقایسە نەکەیمن، هەر بەشێگ لە کوومەڵگە خاون ئەرک خوەیە و هەرکامیان بەیداخ هەڵگر بەشێگ لە ئەرکەگانن.
لە بارەی رووڵ میدیاگان و لایەنەیل کوردی لە کووبینەوەگە هاوریا زوان ک لە راسیە هەتا ئێرەنگەیش بەشێگ لە لایەنەیل کوردی باوەر وە کوومەڵگەی ئیمە نەیرن و خوازن کە لە ناو خوەیان بتاوننەمانەو و ویشن “ئیوە ئەڕا چە لایەن سیاسی دورس کەین و کار سیاسی کەین”، ک ئیە جێ رخنەس و هەر کوومەڵگەیگ ئحتیاج وە لایەن سیاسی و دەسپێشخەر دێرێ، لە پاڵ ئیەیشە ک ئنکار کریەیمن لایەنەیلێگ هەس ک پشتیوانی وە لێمان کەن و توانیم ئاماژە وە کۆنگرەی نەتەوەیی کوردستان کەنەکە و رووڵ ئەوان ک وە جوور چەتر و کوو کردن سەرجەم رەنگەگان بکەیم، تەقەلای فرەیگ ئەڕا ناسانن و تریبون دایێن وە لایەنەیل یارسانی و وە ئەساس گردنیان ئەنجام دانە. هەرلەیوا رووڵ ئاریەن تیڤی ک وە جوور تلویزنێگ لە گشت بوارەگان ئەڕا کوومەڵگەی یارسان تەقەلا کردگە و تەسیر موسبەت خوەیشێ داشتگە، وە گرنگ ناو بریا.
لە بەشێ ترەگ لە کووبینەوەگە باس وە ئەوە کریا ک ئیمە دێریم باس وە هاودەنگی و کار هاوبەش کەیم، ئایا ئیە لە چوارچوەی تاکتیکی-دەم کوڵ جێ گرێ یا ک ستراتژیک-درێژخایان. وە دڵنیایی وەختێگ ئیمە تیەیمنە پاڵ یەک و قسەیگ کەیمن ئەیەر تاکتیکی بووت خوەی گووڵ دایینە و ناتوانیم چەوەڕی ئەنجامێگ خاس بیمن، ئەمانێ ئەیەر ئیمە ستراتژی وێر بکەیم توانێ لە سەر کوومەلگە تەسیر خوەی داشتۊد و ئمێدێگ بوود. هەر لەیوا ئیمە بایس لە سەر کار خوەمان جەخت بکەیم و گوش وە قسەیل بێ بنەوا نەیەیم ک ئەڕا شێوانن و بی تەسیر کردن کارەگان ئەنجام گرێ.
له کووتایی کووبینەوەگە جەخت لە سەر بەردەوامی ئیجوور کووبینەوەیلێگ کریا، ئەڕا فرەتر لە یەک هالی بیێن و رەسین وە چوارچوەیگ دیاری کریاگ و هەنگاو هەڵگردن هاوبەش و کارەیل گەوراتر. هەرلەیوا لە سەر و بن خاونکار توانیەد کار هاوبەشێگ بکریەد و ئیە بوودە یەکم هەنگاو ئەڕا هەنگاوەیل ترەگ. وە ئەو جوورە زانیمن خاونگار هەڵگر پەیام تایوەت وە خوەیە و ئی بۆنە فرە گرنگ و وە ئەرزشە و لە ئیسەوە جەژن خاونکار لە گشت کوومەڵگەی یارسان و گەل کورد پیرووز ویشیمن ک نماد پاوەگەزدان, ئاشتی و سەرکەفتن رووژنایی وە سەر تاریکیە.
