لە ئەنجام تەقەی هێزەیل رژیم داگیرکەر ئێران جوانێگ کووڵبەر یارسانی گیانێ وە دەس دا؛ رووژ سنجاوی
لە ئەنجام تەقەی هێزەیل رژیم داگیرکەر ئێران جوانێگ کووڵبەر یارسانی گیانێ وە دەس دا
ئەڕا گەل کورد مەرز هویچ مانایگ نەیرێ، چۊگە وەختێگ کوردێگ لە رووژهەڵات بچوودە باشوور وە یا بەشێ ترەگ ئەو جوورە وێر کەن کە چینەسە ناوچەی خوەیان، ئەمانگ داگیرکەرەیل ئیە قەبوڵ ناکەن و خوازن زهنیەت پارچەگەرا لە ناو مەردم کورد پێش بخەن.
دۊیەکە هێزەیل ئەرتش رژیم داگیرکەر ئێران لە ناوچەی پەروێزخان شارسان قەسرشیرین ئوستان کرماشان هاووڵاتیگ کە وە مدوو فەقر و بێکاری لە رۊ ناچاری رۊ هاوردۊیە کووڵبەری، لە سەر مەرزەیل دەسکرد کردنەسە ئامانج هێرش چەکداری.
لە ئەنجام تەقەی هێزەیل چەکدار رژیم، کووڵبەرێگ یارسانی وە ناو” حەبیب(حەقمرای) روستەمی خەڵک ئاوایی فەرمانشا لە ئێڵ قەڵخانی گیانێ وە دەس داس.
نەورووز روستەمی براێ ئەو گیانبەختکردگە، لە قسەلێگ وەگەرد سایت یارسان وەت ک حەبیب دۊیەکە ١٢ سەرماوەز ئەڕا کووڵبەری سەردان مەرز کردیە ک دۊیای نیمەرووژ، هێزەیل رژیم وە گولە دانەسە ناو سەرێ و کوشتنەسەی. تەقە کردن هێزەیل رژیم لە وەختێگ بیە ک هۊچ جوورە هوشدار وسیان وە پێ نەیانە و لە ناکاو دانەسەی وەر دەسرێژ گولە.
هەرلێوا نەوروز وەت: چەن رووژ پێش هێزەیل رژیم سەردان ماڵ باوگی و براگەم کردنە و ماڵیان وشکاننە.نەوروز کە خوەی کەسێگ سیاسیە، وەتیە کە هیزەیل رژیم هەواڵ ئەویش پرسینە و گیان وە دەس دان براگەیشێ جێ گومانە و ئەگەر ئەوە دیرێ کە بەرنامە ئەڕای داڕشیاوی.
جێ وە وێر هاوردنە، حەبیب روستەمی لە رووژ ٠١ مانگ جۊیەزەردان ١٣٧٠ لە داڵگ بیە و دو مناڵ کورپە دێرێ ک هاووەخت نان دەڕهاوەر خانەوادەی خوەی و باوگی بیە.
گیان بەخت کردن ئەی هاووڵاتیە لە وەختێگەس، ک کووڵبەرەیل کورد ئەڕا بژیوەی زنەیی و لوقمەیگ نان رێ سەخت گرنە وەر، کە بەردەوام رۊوەرۊ مەرگ بون. لە لای ترەک، ئەو جوورە کە رژیم ئێران باوەرەیل ترەک قەبوڵ نەیرێ،، همیشە خەڵک یارسان لە ژێر فشار بینە و تا ئیسە رژیم ئێران کوومەڵگەی یارسان وە رەسمیەت نەناسیە و ئاسمیلاسیونێگ قورس و فرە ڕەهەند لە ئی ناوچەیلە وەڕێوە بەید.
