شەورای وەڕێوەبەری پلاتفۆرم یارسان: گیانبەختکردێ «ئارگەش زاگرۆس» هسارەێگ زەمینی و مانای مرووڤێگ ئازاد بی
گیانبەختکردێ «ئارگەش زاگرۆس» هسارەێگ زەمینی و مانای مرووڤێگ ئازاد بی
لە دەورانێگ ژیان کەیم ک فرەترین بەها و گەوراترین قوروانی ئەڕا ئازادی کوردستان و ژیانێگ ئاشتیخوازانە دریەد و دژمنەیل خۊنمژ هۊژمێگ گشت لایەنە هاوردنەسە سەر ئەرزشتەیل و دەسکەفتەیل خەڵق کورد، تا بتوانن وە لە ناو بردن خەڵق ئیمە سەرپا بمێنن و درێژە وە خۊنمژی خوەیان بێەن.
ئمڕووژ لە کوردستان بەشێگ لە لایەنەیل کوردی وە مدووێ بێ ئرادەیی و نێاشتن زهنیەتێگ ئازاد و پلانێگ ئەڕا ئازادی کوردستان بینەسە داردەس و جێ‌وەجێکەر ئەرک و کردەوەیل دژمن و هەر ئیە بیەسە دەلیلێگ ئەڕا داسەپانن هەزینەێ فرەترێگ وە خەڵق و قوروانی داێن فرەتر لە ڕێگاێ ئازادی. لە ئی دەورانە ئاڵاهەڵگری تێکووشان ئەڕا رزگاری کوردستان کەفتیەسە سەر شان جمشت ئازادی کوردستان و ڕووژانە لە ناو ئی جمشتە هەزاران کەس گیانفەدایی کەن تا سەنگەر چووڵ نەکریەد و دژمن نەتوانێد هەنگاوێگ وەرەو نوا هەڵبگرێدن.
رژیم داگیرکەر و فاشیست ترکیە جوور ئەندامێگ لە گرێبەست ئاتلانتیک باکوور (ناتۆ) ئێرەنگە وە ئجازە و پشتیوانی هازەیل ئەمپریالیست جهانی هێرش گشت لایەنەێگ هاوردیەسە سەر وڵاتمان و وە کردارەیل دڕندانە –لە دەسگیری ئەندامەیل لایەنەیل کوردی و زندانی و شکەنجە کردنیان، تا هێرشەیل هەوایی وە سەر خەڵق و گەریلا لە گشت ناوچەگان کوردستان-، دەس وە سڕین فیزیکی کردگە و وە ئسفادە کردن لە چەکەیل شیمیایی وەحشیگەری خوەی وە بەرزترین ڕادە ڕەسانیە. لە پاڵ ئیە ڕژیم داگیرکەر ئێرانیش ک بجگە لە دژمنایەتی دیرووکی و جیاوازی باوەر، وە شێوەیل جووراوجوور هەچۊ وە سێدارە داێن، قڕان فیزیکی، تاوانن نەرم یا پاکتاوی سیاسی و فەرهەنگی و … خەڵقەیل و وە تایوەت خەڵق کورد سەرکوت کردیە، وەگەرد حکوومەت ترکیە بینەسە یەک و شان وە شان یەک دژ وە گەل کورد وسانەسە و هەوڵ دەن تا کوردەیل لە ناو بوەن و کوومەڵگە ڕیشەکەن بکەن و تۊیەم فاشیزم خوەیان بوەشننە ناو مەردم کوردستان. ئەمانگ خەڵق کورد وە دۊاێ سەدەێگ واوەسە و هەوڵ و هەڵا ئەڕاێ ئازادی و تێکووشاێن لە ڕێگاێ ئازادی لەی سەردەمە پا وە مەرحەڵەێ تازە و بێوێنەێگ ناس و دەس وە واوەسەێگ دیرووکی کردیە ک وە حەقیەتی «واوەسەێ دەوران» ناو گردیە و جڵوەێگ لە خەبات و تێکووشاێن ئازادیخوازەیل جهان وە تایوەت خوەرهەڵات ناوەڕاست لە وەراێوەر هازەیل داگیرکەر و فاشیست ناوچەیی و هازەیل شەڕخواز ئەمپریالیزم جهانی وە ئەژمار تیەێد. ئەی حەقیقەت ئنکار نیەکریەێد ک ئێرەنگە هازەیل شووڕشوان کورد نوانەر گشت خەڵقەیل ستەملیکریاێ جهان لە شەڕ لە وەراێوەر ئەمپریالیزمن و ئەی ڕاستییە حاشاهەڵنەگرە ک کوردستان و ناوچەیل ئازاد ئیرەنگە وەردینک و ناودڵ شووڕشێگ ئازادیخوازانە دژ وە هازەیل ناونەتەوەیی فاشیست وە ئەژمار تیەن.
هەر لە ناخ ئەی شووڕش و ئاخیزە، هەلەیوا ک پێرەکە ناوەند خەوەرڕەسانی و چاپەمەنی هازەیل پاراستن خەڵق (هەپەگە) وە بڵاو کردن بەیانیەێگ ئێعلام کردیە، دو گەریلاێ قارەمان وە ناوەیل «ئارگەش زاگرۆس» و «جێگەر عەفرین» لە ڕووژ ٣٠ جوولای ئمساڵ (٢٠٢١ زایینی) لە ئاکام هێرش فڕووکەیل شەڕکەر ڕژیم داگیرکەر ترکیە لە کۊیەستان سەربەرز قەندیل گیانیان پێشکەش خەڵق و ئامانج ئازادی کردنە.
شەهید و گیانفەدا «پەیمان شمشێری» ناسریاگ وە «ئارگەش زاگرۆس» لە بنەماڵەێگ یارسان و خەڵق ئاوایی «شێخەسەن» سەر وە ناوچەێ «بێوەنێژ» لە هەرێم داڵاهوو لە ئیاڵەت کرماشان بی ک خوەندن خوەی تا لیسانس لە زانستگا وە پەرتخ ڕەسان. ئەو لە زانستگا تێکەڵ چالاکییەیل خوەندەوانی بی و لە رێ ڕەفیقێگ کامیارانی وەگەرد جمشت ئازادی کوردستان ئاشنا بی و ماوەێگیش ئەنجومەنێگ ئەڕا ژینگەپارێزی وەگەرد هاوڕێیەیل خوەی خستە ڕێ و تا وەختێگ ک لە نیشتمان بی، وە چالاکییەیل ژینگەدووسانەی خوەی درێژە دا. شەهید ئارگەش خاوەن کەسایەتیێگ دڵسوز، نیشتمان دووس و ئازادیخواز بی. ئی هەڤاڵ شەهیدە لەیوا دڵبەستەێ خەبات و تێکووشاێن و دڵسووز نیشتمان بی ک هەنای لە ساڵ ٢٠١٥ چی ئەڕاێ وڵات سوئد، نەتوانست وەگەرد نووڕین و هەڵومەرج و ناکووکییەیل کوومەڵگاێ ئرووپا ڕێک باێد و ژیان دۊر لە وڵات و خەڵق خوەی تاوشت بارێدن. ئەو هەمیشە وەتیاد و باس لە ئەوە کردیا ک “فرە جار ئەسر لە چەوەیلم تیەێد وەختێگ دۊنم مناڵەیل ئرووپایی لە ئێردا وەگەرد ئەسباو بازی خەریک بازی و گەمەن و گجوور ئمکانات پەروەردە و گەمە و خوەشگوزەرانی ها لە دەستڕەسیان، ئەمانگ مناڵەیل کورد لە کوردستان لە ژێر تانگ و تووپن و وەسیلەێ گەمەیان بیەسە تانگ و ئەسلەحە، وە خوەم ئۊشم نەبایس بهاتیام ئەڕا سوئد و بایەد لە وڵات خوەمان بەشدار ڕز جمشت ئازادی بێاتام”. هەڤاڵمان پەیمان کەمتر لە ساڵێگ توانست لە ئرووپا بمینێد و ئافت و هەست نیشتمان پەروەری و تێکووشان ئەڕا ئازادی بییە مەڵەکەی زەینی و نەتوانست گەلەکوومەێ سیستم داگیرکەر و فاشیست دژ وە خەڵق خوەی قەبووڵ بکەێد و ئمجا لە ڕووژ ٢٧ مانگ نوڤامبر ساڵ ٢٠١٦ -هاوکات وەگەرد ڕووژ دامەزریان جمشت ئازادی پەکەکە- بڕیارێگ شووڕشگەرانە و ئازادیخوازانە گرد و بڕیار دا ک لە ڕز جمشت ئازادی بەشدار بوود.
هەڤاڵمان پەیمان لەو کوڵەماوەێگیش ک لە وڵات سوئد بی شوون دەس خوەی وە جێ هیشت و یەکێگ لە دامەزرانەرەیل «پلاتفۆرم یارسان» بی و وە دەرک ئەوەێگ ک خەڵق یارسان ئاتاج وە جمشتێگ نوو و ئازادیخوازانە دێرێ تا بتوانێد دەنگ خوەی بەرزترەو بکەێد و دەس وە مەرحەڵەێ تازەێگ لە ژیان سیاسی خوەی بکەێد، لە دامەزراندن پلاتفۆرم یارسان ڕوڵ گرنگێگ داشت و لە ناو دەستەێ وەڕێوەبەری پلاتفۆرم جێ گرد و ڕوڵ پێشەنگ و دەسپێشخەری لە ڕێ و ڕێباز حەقیقەت گردە وەر. ئەو لە رێکخستن یەکمین سمینار وە بوونەێ جەژن خاونکار فرەترین ئەرک گردە سەرشان و وە خاسترین شێوە ئەرکەیل خوەی جێ‌وەجێ کرد. ئەو هەلەیوا لە ناو وەڕێوەبەری «جوانەیل زاگرۆس» و «جوانەیل ئازاد» جێ گرد و هەر لە ئی چوارچووە ئەڕا جوانەیل دەسپێشخەری کرد و سمینارێگ ڕێک خست و لەو سمینارە لە سەر باوەر یاری و کوومەڵگای یارسان و جەژن خاوەنکار قسە کرد و زانیاری وە جوانەیل دا.
هەڤاڵمان پەیمان لە گشت دەوران ژیانی کەسایەتیێگ کونجکاو بی و ئەڕا ڕەسین وە حەقیقەت لە مینە و گەردیان بی. ئەو لە سەر خوەشەوێستی و لە سەر ئلهامێگ ک لە ڕوڵ شەهید «ئارگەش باوەر» ئەندام کۆمیتەی چاپەمەنی «پارت ژیان ئازاد کوردستان» (پژاک) لە ناو جمشت ئازادیخوازی کوردستان گرد، نازناو «ئارگەش» ئەڕا خوەی هەڵوژانی و هەر وە ئەو ڕووح و نووڕینە تا کووتا هەناسەی خوەی ئەڕا خەڵقی تێکووشا و ئەرک دیرووکی خوەی وە جێ هاورد.
شەهید ئارگەش زاگرۆس درێژەدەر وە سوننەت هەزاران ساڵەێ خەڵقێگ بی ک هەمیشە لە وەر هۊژم و هەڕەشەێ هازەیل نامرووڤ و داگیرکەر بییە و هەمیشەیش لە وەراێوەر زڵم و زوور واوەسە کردیە و سەرەڕاێ ئەی پەلامارەیلە توانستیە ڕێگاێ حەقیقەت جوور چراخێگ ڕووناک ک پرشە وە ژیان خەێد بپارێزێد و ئایین و مەرام خوەی لە تەنگاوییەیل دیرووکی دەرباس بکەێدن. وەی هووکارە دیرووک ئەی خەڵقە وە خۊن نۊسریایە و هەزاران کەس لە درێژاێ سەدەیل پەیەڵپەی گیان خوەیان ئەڕاێ پاراستن ئەی ڕێگا و ڕێبازە باخت کردنە. ئمڕووژیش خۊن هەڤاڵ ئارگەش ک وە دەس مزۊرەیل و نەوکەرەیل ئەمپریالیزم لە ناوچەێ خوەرهەڵات ناوەڕاست و لە سەریان ترکیەێ فاشیست و داگیرکەر وە زەوی ڕشیاس، درێژەێ خۊنەیلێگە ک دیرووک یارسان و داڵاهوو نەخشاننە و وە پەیام واوەسە ئەڕاێ ژیان ئازادانە ژیان و دیرووک ئیمە ڕەنگینەو کردنە.
ئیمە هە چۊ پلاتفۆرم یارسان لە کەسایەتی هەڤاڵ ئازا، تێکووشەر و پێشەنگ خەڵقمان «ئارگەش زاگرۆس» پەیمانمان وەگەرد خەڵقمان دوارەوە کەیم ک تا سەرکەفتن رێ و رێباز و ئاماجەیل هەڤاڵمان سەنگەر چووڵ نەکەیم و درێژە وە تێکووشان بێەیمن. هەلەیوا شەهیدەیل ئازادی -لە سەید قوربان حوسەینی، شاهین داڵاهوو، زاگرۆس مانی، زاگرۆس بەرزەوان، زانا کرماشان، سەربەرز کرماشان، مێهرداد شاهمورادی، سمکۆ داڵاهوو و گشت شەهیدەیلێگ ک لە ڕێ ئازادی، بەرابەری، هاوژیانی، دموکراسی و سۆسیالیزم گیانیان بەخت کردنە- وە ڕێزەو وە ویر تیەریمن و سەرسڵامەتی خوەمان لە بنەماڵەی گەورای «شمشێری» و گشت خەڵق یارسان ئێعلام کەیمن. وە باوەر ئیمە تەنیا جواو وە هۊژم گشت لایەنەێ داگیرکەرەیل و وەکراگیریاگەیل، هاودەنگی و یەکڕێزی لە ناو ماڵ یارسانە و لە سەر ئی بنەوایشە داوا لە گشت خەڵق یارسان و وە تایوەت جوانەیل و ژنەیل یارسان کەیمن ک بەشدار ڕز تێکووشان و ئازادی بن تا ک همێد و ئاماج شەهیدەیل لە زۊترین وەخت بکەیمنە ڕاسی و خەڵقمان لە ئاشاز و ئازادی و هاوژیانی ژیانێگ ئازاد، بەرابەر و دموکراتیک داشتوون.
شەورای وەڕێوەبەری پلاتفۆرم یارسان
