لە ستۆکهۆڵم وڵات سوئد مەراسم ڕێزگردن شەهیدەیل ئارگەش زاگرۆس و جێگر عەفرین وەڕێوە چی
ئمڕوو یەیشەمە ساعەت ١٥:٠٠ لە ستۆکهۆڵم پایتەخت وڵات سوئد ڕێوڕەسم ڕێزگردن وە یای و هۊرمان شەهیدەیل ئارگەش زاگرۆس و جێگر عەفرین وە بەشدار دەیان کەس لە هەر چوار بەش کوردستان وەڕێوە چی.
شەهیدەیل ئارگەش زاگرۆس و جێگر عەفرین لە رووژ ٣٠ جوولای ٢٠٢١ زایینی وە مدوو بومواران تەیارەیل شەڕکەر رژیم تورکیە لە کۊیەسان قەندیل گیانیان بەخت بی.
ڕێوڕەسمەگە وە دەسپێشخەری پلاتفۆرم یارسان، جوانەیل زاگرۆس و کوومەڵەی ژنەیل ئامارا لە کومەڵەی روشنهۊری و هونەری کوردی لە ستوکهۆڵم وەڕێوەچی.
مەراسمەگە وە یەی دەقە بێ دەنگی ئەڕا ڕێز گردن لە یای و هۊرمان گشت شەهیدەیل ڕێ ئازادی دەسوەپێ کرد و لە شوونێ سیاسەتمەدار کورد سەنانیک ئونین لە قسەیلێگ وەت: باوەر و ئاست و هەست نیشتمان دووسی لە کەسایەتی شەهید ئارگەش وە ئەنازەیگ بەرز بیە ک ئورۆپا وە جێ هیشت و گلەو خوارد ئەڕا کوردستان و تێکووشان ئازادی. پاوەگەزدان و دیرووکمان لە سەر خۊن ئەو شەهیدەیلە بەرزبیەسوە.
لە درێژەی مەراسمەگە وە نمایەندگی وە پلاتفۆرم یارسان ساسان مێهرابی لە قسەیلێگ وەت: هەڤاڵ ئارگەش مرۆڤێگ بی ک نیشتمان و ئازادی لە ناو هەست و بیێنێ بی. هەمیشە وێر وە ئەوە کرد ک وە چ لەونێگ کریەد خاسترین هەنگاو هەڵبگریەد ئەڕا ئازادی کوردستان. راسە هەڤاڵ ئارگەش خەڵک رووژهەڵات کوردستان بی ئەمانگ هەڵس و بنیش و هەڵوێستێ کوردستانی بی و وە ئی مدوو خەباتێ ئەڕا هاوژیانی، ئازادی و بەرابەری بی.
هەلێوا ویدئوێگ لە بارەی شەهیدان ئارگەش و جێگر ئەڕا بەشدار بیەیل پەخش کریا.
لە کووتاییە ڕێ‌هەڤاڵ و ئەندام وەڕێوەبەری جوانەیل زاگرۆس ئەژین ئەحمەد لە قسەیلێگ وەت: وە راسی زامەتە مرۆڤ باس وە هاو خەباتێ بکەید ک گیانێ بەخت بیە، ئەمانگ لە راسیە مرۆڤێگ ئارام و دەم وەخەنین و دڵسوز نیشتمان و کلتور و هویەت خوەی بی.
