رێکخراو یاری کورد و پلاتفۆرم یارسان: جەژن قەوەڵتاس نماد هاوپەیمانی و یەکیەتی لە گشت یارەیل و کوردستانیەیل پیرووز بووت

جەژن قەوەڵتاس نماد هاوپەیمانی و یەکیەتی لە گشت یارەیل و کوردستانیەیل پیرووز بووت

دوجارە لە کڕیوەی زوقوم و وەفر زمسان چیمنە پیری یەکێگ وە جەژنەیل پیرووز و رووژەیل دیرووکی خەڵڤمان ک ئرادەیک فولادی بیە مدوو خوڵقیان ئی جەژنە. جەژنێک ک هەفت یار، تێکووشەر و ڕێبەرەیل کوومەڵگەمان لە ناو کڕیوەی وەفر و بەوران ئەڕا پێکهاوردن ئەرک دیرووکی خوەیان پا دانەگەز تا ک پەرتەخێ بوودە ئەوە ک بڕیارێ دانە. جەژن قەوەڵتاس دیرووکێگ وەگەرد خوەی تێرێ ک وە پێمان وێشێ تا چەنێگ لە سەر ئرادە و هاز خوەمان سوڕ و جەخت بکەیم ئەو ئەنازە وە ئازادی و رەسین وە ئاماجمان نزیکتریم.

رەوش کوومەڵگەی یارسان لە ناو ساڵ وەرین وە جوور ساڵەیل وەرین لە ژێر زەختێگ فرە بیە و رژیم داگیرکەر ئێران هۊژمێ ئەڕا تاوانن کوومەڵگە درێژە داس، کردەوەیل چەپەڵ خوەی لە بڵاو کردن قسەیل دۊر لە ڕاسی کوومەڵگە هەتا ئاژاوەنایێن و دوبەرەکی خستن وە ناو کوومەڵگە جێوەجێ کردیە تا ک تاکێک یارسانی لە هوویەت و کلتور خوەی دۊر بخریەد، کلتورێک ک خاون ڕەنگینیگ لە وێنەی ژیانەوی ئایەمیزا لە شاهوو و داڵاهوو هەتا مانێشت و هیگەرەس.

هاو لەون ئەوەیگە بەشێگ لە کوومەڵگەی یارسان لە رووژهەڵات و ناوچەیلێگ لە ئێران ژیان کەن، لە باشوور کوردستانیش کوومەڵگەی یارسان/کاکەیی رۊوەرۊ خەتەر و هۊژم چەتەیل داعش و ئسلام سیاسی قەرار گردنە، ئی بەشەیشە لە کوومەڵگە وە مدوو سیستم سیاسی باشوور کوردستان و قەیرانەیلێگ ک هەڵقوڵیاگ کار و کردارەیل دەسەڵاتدارەیل باشوور کوردستانە رەوش مەردممان لە ئەوردا تاریفێگ نەیرێ و ژمارێگ لە ئاوایەیل ناوچەیل کەرکووک هەتا خانەقین ک یارسان‌نشینن وە مدوو هێرش و خەتەرەیل سەریان وە خاتر باوەری جیاوازیان، چووڵ کریاس و ئاوارەی ناوچەگان تر بینە ک تەنانەت خەتەر چووڵ بیێن بەشێ‌تر لە ئاوایی و شوون نیشتەجێ بیێن مەردمان یارسان هەس. ئەوەیگە ئمڕوو کوومەڵگەی یارسان وە پێ موحتاجە گرنگی دان و پاڕاستن ئەوانە ک ئەویش بایستەس لە لایەن دەسەڵاتدارەیل باشوور کوردستان گرنگێگ تایوەت وە پێ بیەن نە ئەوەیگە تەنیا ئەڕا وەخت پێوست باس وە ئەو کوومەڵگە بکریەد.

ئیمە وە جوور ڕێکخراو یاری کورد و پلاتفۆرم یارسان هاتن جەژن قەوەڵتاس وە گشت کوومەڵگەی یارسان/کاکەیی و کورد و کوردستان پیرووز ویشیمن و همێدمان ئەوس وە تێکووشانێک بێ وچان و ئاماجدار توانیم کوومەڵگەیک ئازاد داشتۊمن ک ئەویش وە یەکڕێزی، هاوپەیمانی و وەرگردن ئرادە و پەیام قەوەڵتاس و خاوەنکار وە دی تێ، وە دڵنیایی هاودەنگی و تێکووشان دموکراتیک کوومەڵگەیک هووشیار و ئازاد سازێ و ئەو وەخت ئاماج شەهیدەیل ک ئەڕا ئازادی و بەرابەری گیان شیرین خوەیان فەدا کردنە، وە حەقیقەت رەسێد.

ڕێکخراو یاری کورد
پلاتفۆرم یارسان

https://yarikurd.net/ku/%d8%ac%db%95%da%98%d9%86-%d9%82%db%95%d9%88%db%95%da%b5%d8%aa%d8%a7%d8%b3-%d9%86%d9%85%d8%a7%d8%af-%d9%87%d8%a7%d9%88%d9%be%db%95%db%8c%d9%85%d8%a7%d9%86%db%8c-%d9%88-%db%8c%db%95%da%a9%db%8c%db%95/