شەورای وەڕێوەبەری پلاتفۆرم یارسان: شێعر پەرتەو جامەکێگە ک باڵاێ فەرهەنگ و دیرووک خەڵق کرماشان لە ناوی دیارە

شێعر پەرتەو جامەکێگە ک باڵاێ فەرهەنگ و دیرووک خەڵق کرماشان لە ناوی دیارە

ئمڕووژ شەوەکی 5 ڕێبەندان 1400 دڵ مامووسا پەرتەو کرماشانی لە ڕپە وساد و ئەی شاعر توانا و دڵسووز مەردمی ک ناوەگەی وەگەرد کرماشان و فەرهەنگ و ئەدەبە دیرینەگەی پەیوندیێگ جیانەکردنی دێرێ لە دنیا چی.

مامووسا پەرتەو کرماشانی ک لە ساڵ 1310 لە شار کرماشان وە دنیا هاتۊ، لە درێژاێ چەند دەهە چالاکی ئەدەبی خوەی وە دو زوان کوردی و فارسی شێعر وەت و توانس وە ژمار کەمێگ غەزەڵ و دوخشتی وە کوردی کرماشانی گیان تازەێگ وە ئەدەبیات کوردی لە ناوچەێ کرماشان و ڕووژهەڵات کوردستان بوەخشێدن و لە فەرهەنگ کوردی کرماشان ک وە مدووێ سیاستەتەیل ئستێعماری وە ماوەێ درێژێگ تۊش بێجم جۊڵی هاتۊ، دەس وە وەرز نووێگ بکەێد.

پەرتەویش هەچۊ زوورم شاعرەیل و ئەدیبەیل کورد کرماشانی دۊرەپیەرێزی و خاکەساری وە بانتر لە خوە لەوەرچەو خستن ئەڕاێ جهان ڕەنگ وە ڕەنگ میدیایل یا پەسەنخوانی ئەڕاێ دەسەڵاتدارەیل زانی و لە درێژاێ ژیان خوەی هەرگز ژێر بار هاوکاری وەگەرد دامەزراوەیل حکوومەتی و وابەستە نەچی و سەروەخۆیی فکری شاعر و هنەرمەن لە هەر چشتێگ ئەڕاێ خوەشتر بۊ. ئەمانی ئەی دۊرەپیەرێزی نە وەخاتر دژەکوومەڵگا بۊن، بەڵکە وەخاتر عشق وە مەردم و کوومەڵگا بۊ و ڕاستیەت ئەی ئێدعا لە حەقیقەتە دیارە ک کەمتر کەسێگ لە کرماشان پەیدا بوود ک شێعرێگ لە پەرتەو نەشنەفتۊ و یا تەنانەت هەڵوەسێگ لەلێ لە هۊر خووەی نیاشتوودن.

شێعر پەرتەو جامەکێگە ک باڵاێ فەرهەنگ و دیرووک خەڵق کرماشان لە ناوی دیارە؛ ڕۊداوەیل و هۊرمانەیل تیەڵ و شیرن، بسکەخەنەیل و ئرمێسەیل، عشق و سەرخوەشی تا حەماسە و وەسف سرشت و تەنانەت وەگەردیەک ژیاێن ئاشتیخوازانەێ پێکهاتەیل فەرهەنگی جووراوجوور لە کرماشان گشتی لە شێعری دۊنریەێت و شێعرەگانی کردیە وە قوتگەێگ لە ئەدەبیات کوردی و فارسی.

جێ باوەرگەمانی نییە ک یاێ مامووسا پەرتەو کرماشانی لە هۊرمان گشتی خەڵق کورد و وەتایوەت مەردم کرماشان زنە و جاوید مینێد و کارەگانی لە بانانیش ڕێنماێگ ئەڕاێ هنەرمەنەیل، شاعرەیل و نۊسەرەیل دڵسووز ئەی وڵاتە بوون. ئیمەیش چۊ پلاتفۆرم یارسان کووچ دۊایی هەڵوەسوان دڵسووز و مەردمی کورد مامووسا پەرتەو کرماشانی وە مەردم و کوومەڵگاێ فەرهەنگی کرماشان و هەلەێوا گشت کوردستان و ئێران سەرسەڵامەتی ئۊشیمن.

شەورای وەڕێوەبەری پلاتفۆرم یارسان
5 ڕێبەندان 1400