شەورای وەڕێوەبەری پلاتفۆرم یارسان: شەهید ئارگەش زاگرۆس هەسارەیگ زەمینی ک مانای راسەکانی مرووڤ ئازاد بی
شەهید ئارگەش زاگرۆس هەسارەیگ زەمینی ک مانای راسەکانی مرووڤ ئازاد بی
دەوران ئمڕوو لە کوردستان، سەردەمێگە ک هویەت، بیێن و ژیانمان دیاری کەید و لە ئەگەر کەمتەرخەمی تاکێگ وە کوومەلگایەیل کوردستان، لەتمەیگ گەورا لە تێکووشان بانانمان دریەید، هۊژم ئێرەنگەیی داگیرکەرەیل کوردستان لە سەر کوردستان لە ئاستێگە ک لە دیرووکمان لە وێنەی ناوینیمن، لە لایێگ داگیرکەرەیل ئێران، تورکیە، عەراق و سوریە و لە لای ترەگ زهنیەت و سیستم کاپیتالیسمی، هاووەخت وەگەرد ئیانە لە ناو کوردیش خەت خیانەت بیەسە داردەس ئەوان تا ک کورد ئازاد و مرووڤ ئازاد بن‌بڕ بکەن و تاکێگ ئازاد وجوود نەیاشتۊد.
لە ئی سەردەمە ئاست و هەست نیشتمان دوسی و بەرابەریخوازی تاک و جمشت کورد توانێ رویوەروی ئیجوور هۊژمەیلێگ بوود و ئازادی کوومەڵگا وە دی باێد. یەکێگ وە تاکەیل کوومەڵگا ک ئەودژ ئی هۊژمە ئەرک سەرشانێ وە جێ هاورد شەهید پەیمان شمشیری ناسریاگ وە ئارگەش زاگرۆس بی، شەهید ئارگەش زاگرۆس وە دەرک رەوش ئێرەنگەیی و ناسین فەلسەفەی ئاپۆیی، خوەی وەجوور گیانفەدایگ، ژیان خوەی ئەڕا ئازادی نیشتمان و ئنسانیەت تەرخان کرد و بڕیار بەشداری لە رز جمشت ئازادی دا تا ک بتوانێ وە تێکووشان ٢٤ ساعەتە ئەرک دیرووکی خوەی وە جێ بارێ.
شەهید ئارگەش مرووڤێگ بی ک لە ئرووپا ژیان کردیا و هۊژم سیستم کاپیتالیسم لە سەر کوومەڵگایەیل ئرووپایی و کوردەیل نیشتەجێ ئرووپا دۊنیاد ئەمانگ خوەی وە جوور مرووڤێگ ئازاد ک گرێ‌دریاسە نیشتمانێ، رێ تێکووشان لە جەوڵانگای کویەیل ئازاد و هەرێمەگان پارێزین مێدیا دی، هەر چەن لە رووژ یەکم هاتنێ وە ئرووپا لە ناو چالاکی و جمشت کوردی ئرووپا جێ گریوی و بیویە دەنگ کوومەڵگاکەی.
شەهید ئارگەش جیا لە ئەوە ک باوەر وە تێکووشان لە ئاست گشتی کوردستان داشت باوەر وە تێکووشان لە ناو کوومەڵگەی خوەی ک بەشێگ وە کوردستانە و چارەنۊس دانەیکیان گڕێ‌دریاسە گشت، لە دامەزرانن پلاتفۆرم یارسان رووڵ سەرەکی داشت و لە دۊیای دامەزریان پلاتفۆرم یارسان ئەرک خوەی لە رێوەبەری و بەش دیپلۆماسی وە خاسی جێ‌وەجێ کرد تا ک لە ئی دەروەچە بتوانێ خزمەتێگ وە کوومەڵگای بکەید. باوەر داشت ک کوومەلگای یارسانیش بایس جێ خوەی لە ناو تێکووشان ئازادی خوازی کوردستان بکەیدوە و بتوانێ بوودە یەکێگ وە چالاکترین پێکهاتەیل کوردستان و شوون و لوون خوەی هاوشیوەی دیرووکێ لە ناو دیرووک سەردەم واز بکەید. هەلێوا لە رێکخراو جوانەیل زاگرۆس ک وە جوور یەکێگ وە سوینەیل سەرەکی و بناخەی کوومەڵگا نووڕیە پێ، جێ گرد.
لە یەکمین ساڵڕووژ شەهید هەمۊشە زنێ ئارگەش زاگرۆس یاد و هۊرمان و تێکووشان شەهید ئارگەش، جێگر ئەفرین، مێهرداد شاهمورادی، زاگرۆس مانی، زاگرۆس بەرزەوان، سمکۆ رووژهەڵات، سەی قوروان حوسەینی، عەگید رووژهەڵات، رزگار زەرنەیی و گشت گیانبەختکەرەیل رێ ئازادی و بەرابەری‌خواز وە وێر تێریم و قەوڵ و پەیمانمان نووەو کەیم ک تا رەسین وە ئاماج شەهیدەیل تێکووشان درێژە دەیم. هەلێوا داوا لە تاک وە تاک کوومەڵگا کەیم بەشدار تێکووشان ئازادی بن تا ک ئارەزوو و ئاماج شەهیدەیل لە زۊترین وەخت وە دی باریمن.
شەورای وەڕێوەبەری پلاتفۆرم یارسان
