خاوەنکار لە ھاوڕێیەتی وەگەرد «ژن، ژیان، ئازادی» بەرز و پیرووز گریمن

خاوەنکار ئمساڵ فرەتر لە هەر زەمان ترەک پەیامھاوەر شکیاێن سەرماێ زمسانە و ئەی جەشن نەمادینە ئیرەنگە وە ئاشکراترین شکڵێگ، ماناێ دیرووکی خوەی لە وەراێوەر چەوەیل خەڵق ئیمە پیشان دەێدن. ئەگەر لە ساڵەیل پێشین لە پێویستبۊن داشکانن سەرماێ زمسان وە ڕێگەێ واوەسە و یەکێتی باس کریا و خاوەنکار ئەنگیزەێگ ئەڕاێ وەگەردیەکبۊن و هاوپەیمانی ئەڕای ڕەسین وە ئامانجەیل بەرابەریخوازانه و ئازادیخوازانە بەخشیادە خەڵق، ئیسە لە ناوەین جمشتێگ مەزم ک لە سەرماێ دەورەێ ئیمە گەرماێگ ژیاندەر ھاوردیەسە دی، پەیام دیرووکی ئەی جەشن نەمادینە فرەتر لە هەر زەمان ترەک مانا پەیدا کردیە. لە جمشتێگ قسە کەیمن ک تا چەن ڕووژ ترەک چوودە ناو سێوەمین مانگ خوەی و لەی ماوە لە باکوور تا باشوور و ڕووژھەڵات تا ڕووژاواێ جوغرافیاێ ئێران فەراتر لە دین و نەتەوە وەگەرد یەک هاوڕێ و ھاودەنگ کردیە و پایەیل ڕەژیم دیکتاتوری پاشکەفتنخوازانەێ فاشیستی کوومار ئسلامی ھاوردیەسە لەرزە و ڕکیان.
ھە لەیوا ک شایەت بۊمن، ھەر لەو گڕێگ ک داگیرکەرەیل سەرشێت لە خۊنڕشانن و سەرکوت لە ساھۊرەێ سقامداێن وە ھاز خوەیان بۊن، وە ناکاو لە خۊن چۊزە دریا و لە زەمانێگ ک گشت چەوەڕێ سەرەتاێ زمسان بۊن، وەکتوپڕ وەھار خەڵقەیل دەسوەپێکریا. ئەگەر ئاخێز و شووڕش «جەشن خەڵق»ەسە، ئیرەنگە دو مانگە ک خەڵقەیل ئێران دەس لە دەس یەکترەکی وە ڕێبەری و مەیدانداری ژنان چینەسە پیری وەھار ئازادی و ھاوڕێ وەگەرد یەک لە ستایش «ژن، ژیان، ئازادی» جەشن گەورەێگ خستنەسە ڕێ. ئەی شوعار ک لە فەلسفە و ھۊر و ڕاێ ڕێبەر ئازادیخواز خەڵق کورد عەبدوڵڵا ئۆجالان مایە گرتیە، ئیرەنگە دیتر سنوورەیل نیشتمان بەزاندیە و بۊەسە شوعارێگ جھانی و دەورانساز ک دیمەنێگ لە ئازادی و بەرابەری و یەکێتی دمۆکراتیک لە وەراێوەر ژنەیل گووڕانکاریخواز و خەڵقەیل ئێران ھاوردیەسە دی و یەێ کەڕەت ترەک ڕووح ژیان ھاوردیەسە ناو کاڵبەد مەردمێگ ک لە ستەم و نەداری و دچەوەکی وە گیان ھاتنە. ئیرەنگە خۊن ژینا و خویشکەیل ئەو چۊزە دایەس ک میوەێ ئەوانە ھەر ئەی تێکووشانەیل یەکگرتیانەێ بێپێشینەێ خەڵقەیل لە کوردستان تا بەلووچستان و لە گیلان و مازەندەران تا ئازەربایجانە و ئیە لە حاڵێگە ک پشتیوانییەیل مەردمی لە سنوورەیل دەسکرد فەراتر چیە و مەقام یەکێتی لە هەر جێێگ لە سەرزەوی زاملێدریاگ و خەمدریاگ خوەرھەڵات ناوڕاس تیەێدە گووش. تۊەنیم بۊشیمن ک وە ھاتن «ژنان» وە مەیدان، لە چەو مەردم یەی کەڕەت ترەک «ژیان» جێ دیمەن ترسھاوەر 43 ساڵ مەرگ و ئێعدام و سیاتی گرتیە و ھمیێگ بێوێنە وە «ئازادی» و دۊاڕووژیگ ڕووشن لە دڵ خەڵقەیل گیان گرتیەس.
ئەی دیمەن بەرزبۊنەوەێ تێکووشانەیل ژنەیل و یەکێتی خەڵقەیل لە ئێران بایەد بیلیەێدە پاڵ وێنەێگ لە تێکووشانەیل خەڵق کورد لە ھەر چوارپارچەێ وڵات وەتایوەت لە نێو سەدەێ وەرین تا بتۊەنیم دینامیزم ڕزگارکەر تێکووشانەیل مەردمی کوردستان جوور موستەعمرەێگ ناونەتەوەیی و ڕۆل ئەو لە ژیانداێن وە گشت جوغرافیاێ ئستێعمارلێدریاگ خوەرھەڵات ناوڕاس دەرک بکەیمن. ئیرەنگە دەنگ ڕووژاوای کوردستان نە تەنیا لە ڕووژهەڵات وڵات تیەێدە گووش، بەڵکە تا تێران و گیلان و ئەفغانستانیش پێش چیە و شوعار ژنەیل شووڕشگەر باکوور لە قوڕگ ژنەیل ستەملێکریاگ بەلووچ و عەرەب ھاوار کریەێد. ئەگەر بتۊەنیم دەسکەفتێگ ئەڕاێ ئەی تێکووشانەیلە بپژرانیمن، ئەو دەسکەفت ھەر یەسە ک ئەڕاێ یەکم کەڕەت خەڵقەیل بێ دەسەژێکردن ناسیۆنالیزم و ئایین هاودەنگ بۊنە و فەرهەنگ سیاسی نوێنێگ وە بنەماێ ئەسڵەیل پێشکەفتنخوازانە و دمۆکراتیک لەپسا وە دی تیەێد. دەسکەفتێگ گرینگتر لە ئیە نییە ک ئیرەنگە خەڵقەیل لە «بەرخوەدان ژیانە» ڕەسینەسە «ژن، ژیان، ئازادی» و لە مەیدان خەبات ھاوبەش، وە درۆس کردن یەکێتیێگ دمۆکراتیک، ئاسووێگ لە ئازادی و بەرابەری تیەرنە دی.
ئیمە جوور پلاتفۆرم هۆرام، یاری کورد، یەکیەتی شووڕشگەرەیل کوردستان و پلاتفۆرم یارسان ھاوکات وە پیرووزبایی کردن جەشن خاوەنکار وە خەڵق یارسان، یەکێتی خوەمان وەگەرد ئاخیز شووڕشگەرانەێ خەڵقەیل و جمشت «ژن، ژیان، ئازادی» ڕایڕەسنیمن و یاێ و ھۊرمان شەھیدەیل لە سەرەتاێ ساڵ نووێ یاری بەرز ڕاگریمن. وە باوەر ئیمە لە ژێر ئەی شوعارە خۊن ژنەیل تێکووشەر نەوەیل وەرین لە نەوەێ گووڕانکاریخواز تازە مانا پەیدا کردیە و ژیاندەرەو بۊە. وەتایوەت لە شەھیدەیل جمشت ئیرەنگەیی ژینا ئەمینی و مینوو مەجیدی جوور نمادەیل «ژیان» یاێ کەیمن. ھەلەیوا جوور پلاتفۆرم هۆرام، یاری کورد، یەکیەتی شووڕشگەرەیل کوردستان و پلاتفۆرم یارسان ھاوکات وە داخوازی لە گشت حزبەیل و ڕێکخریاگەیل سیاسی کورد لە ڕووژهەڵات کوردستان ئەڕاێ کووبۊن لە ژێر یەێ ئاڵا و سقامداێن وە یەکێتی نەتەوەیی، ئاڵاێ کوومار کوردستان ک ھۊرمانێگ لە خۊن شەھیدەیل ڕووژهەڵات لە قازی محەممەد تا شەھیدەیل نەوەێ نووێنە ئاڵاێ خوەمان زانیمن. یەێ جار ترەک جەشن خاوەنکار وە گشت مەردم کوردستان، وەتایوەت پەیرەوان ئایین یاری و خەڵق یارسان لە سەراێسەر پانتایی جوغرافیاێ یارسان لە داڵاهوو تا دڵفان و لە دینەوەر تا داقووق، لە مازەندەران تا ئازەربایجان و لوڕستان و لە کرمان تا کەرکووک و تێران و شارەیل ئرووپا پیرووزبایی کەیمن. وە باوەر ئیمە ھەر وەو شێوە ک یەکگرتن و یەکێتی یاران ڕەمز ویەردن لە زمسان بۊ، خەڵق ئیمەیش لە یەکێتی وەگەرد خەڵقەیل ترەک وە ڕەمز «ژن، ژیان، ئازادی» زمسان پاشکەفتنخوازی و ستەم و نابەرابەری نەیدە پشت سەر.
پلاتفۆرم هۆرام
ڕێکخراو یاری کورد
یەکیەتی شووڕشگەرەیل کوردستان
پلاتفۆرم یارسان
خاوەنکار 2022