پلاتفۆرم یارسان: با جەژن خاوەنکار بکریەدە دەسپێک موبارزەگەری نوین ئەڕا ئازادی و بەرابەری
با جەژن خاوەنکار بکریەدە دەسپێک موبارزەگەری نوین ئەڕا ئازادی و بەرابەری
جارێتر وە پیری خاوەنکار بەرخوەدان لە زمسان سەرد و کڕیوە چیمن، خاونکارێگ ک وەگەرد خوەی ژیان دوجارە و نووەو کردن پەیمان ژیان و کردار ڕاس تێرێ. خاوەنکارێگ ک هەڵگر پەیام موبارزە دژ وە زاڵمەیل و ستەمە.
ئیمساڵ خاوەنکار لە وەختێگە وەڕێوەی‌بردیم و چیمنە پیری جەژن بەرخوەدان خاوەنکار، دۊیەت دیارمان ئارمیتا گراوەند وە دەس دەسەڵات زاڵم وە قەتڵ ڕەسی، دەسەڵاتێگ ک دێرێ وە ملهوڕی ژیان هەنینەیل ئازا جوور ئارمیتای وەرزشکار، هونەرمەند و نەترس، گرێد. ئی جوور جنایەتەیلێگ وە هۊچ جوورێگ قەبوول ناکریەد و مەحکومە.
لە پاڵ ئیە جنایەتەیل تر ئی ڕژیمە لەوای داسەپانن سزای ئێعدام ئەڕا غوڵامڕەزا ڕەسایی، سزای زندان ئەڕا موژگان کاووسی و زندانی کردن سیاوەش حەیاتی وەچەو دۊنیمن، جنایەتەیلێگ ک ئاماج سەرەکی لە بەین بردن جۊلەی ئازادی لە کوومەڵگەس، دەنگ حەقخوازیێگ ک لە دیرووکمان هەتا ڕووژ ئمڕوو هاوەگەردمان و یەکێگ وە سۊنەیل سەرەکی شێواز ژیانمانە.
خاوەنکار ئیمساڵ لە ناو یەی ساڵەگی ئنقڵاب ژن ژیان ئازداییە و لە ئی ماوەیشە جوانەیل و ژنەیل ئازای کوومەڵگەمان لە ڕز نوای موبارزە دژ وە تاریکپەرەستی بین و هاوشیوەی ڕەچەلەک و باوەرییان وە شوون ئازادی و هاوژیانی بین تا ک دەنگیان لە گشت وەختێگ بەرزتر بوود، تا ک دەنگ کپ کریایان هاوار بکەن.
دەسەڵات ملهوڕ ئێران وەگوورەی زهنیەت و کردارەیل چەپەڵێ لە ناو یەی ساڵ ویەردە هاوشیوەی ساڵەیل وەرین تەقەلای فرەیگ ئەڕا ئاسمیلە کردن و تاوانن ئی کوومەڵگە داس. ڕژیم وە ئستفادە لە موزوۊرەیل و جیرەخوەرەیلێ تەقەلا کەید کوومەڵگەیگ ک ڕەنگ کوردستان و زاگرۆس دێری و هەڵگر بەش ڕەسەن فەرهەنگ میلکان ژیانەوە و موبارزە لە کوردستانە بێ کاریگەر بکەید، وە ئی کردەوەیلە بتوانێ نوای گەشەی فەرهەنگ و موبارزە بگرێ. یارسانێگ ک وە پەیام ڕاسی و پاکی هاتیەسە ناو جەوڵانگا، ئمڕوو نەتەنیا لە ناو نەتەوەی کورد بەلکێ لە ناو نەتەوەیل ترەگیش باوەردار و پەیرەو دێری، هەڵێوا پەیمانێگ کوومەڵایەتی دمۆکراتیک وە دی هاوردیە ک یەکێگ وە ڕێچارەیل هاوچەرخ ئەڕا ژیان کوومەڵگەیەیل لە بانان ئازادیە.
وە جوور پلاتفۆرم یارسان سڵام لە هاوار ئازادی و بەرابەریخوازی کوومەڵگەکەمان کەیم و باوەر دێریم ک خاڵ گرنگ ئەڕا گەشتر کردن موبارزە ئەڕا رەسین وە ئازادی، توانێ سازماندهی و سوڕن بیێن لە بان ڕێ ڕاسی و چوارچوەی پەیمان کوومەڵایەتی و باوەری یارسان بوود. لە گشت گەورایەیل، جوانەیل و ژنەیل یارسان داخواز دێریم جەژن خاوەنکار ک یەکێگ وە خاڵەیل گرنگ کوومەڵگامانە وە جوور دەسپێگ موبارزەی نوین ئەڕا وە دی هاوردن ئازادی کوومەڵگەمان بویننەی و ئازادی کوردستان، ئازادی کوومەڵگەی یارسانە، ئیە زەنجیروار وەیەک وەسلە و ئازادی کوومەڵگەمان وە هاوپشتی وە گەرد پێکهاتەیل تر کوردستان و نەتەوەیل جوغرافیای سیاسی ئێران وە دی تێد نە گرێ دایێن خوەمان وە دەسەڵاتخوازەیل، داگیرکەرەیل و قاتڵەیل وەرین کوومەڵگەمان. جەژن پاوەگەزدان خاوەنکار لە گشت کوومەڵگەی یارسان و نەتەوەیل تر پیرووز هویشیم، همێدمان ئەوەس جەژنەیل خاوەنکار لە بانان نزیک لە سەر میلکان خوەمان کوردستان وەڕێوەی بوەیم.
پلاتفۆرم یارسان
٠٩/ ١٠/ ١٤٠٢
