وریشه مورادی؛ ئەڕا گشت ئەوانەیگە سەر نانەسە داوان خاک تا کەسەیل ترەگ هەناسەی نووێگ بکیشن
نامەی وریشە مورادی لە زندان ئڤینەو وە بوونەی ٨ مارس؛ ئەڕا گشت ئەوانەیگە سەر نانەسە داوان خاک تا کەسەیل ترەگ هەناسەی نووێگ بکیشن
لە پشت میلەیل زندان، ئەو شوونێگە ک بایا نۊر لە زەین و دڵ مرووڤ مینە بکەید، ٨ مارس وە ژنەیل موبارز و دەسپێشخەر، لە هەر جێگ لە ئی کورەی خاکیە بمارک هۊشم. ئیمساڵ لە ڕووژەیل گەرم چالاکیەیل ژنەیل چیمنە پیری ٨ مارس، نووڕمە هەر جێگ، بوو خوەش دەسکەفتەیل ژنەیل ڕەسێدە لویتم و خوەشحالم لە قەرن ٢١، زەنجیرەی موبارزەیل ژنەیل ڕووژ لە شوون ڕووژ وەیەک گرێ خواردێ‌تر لە جاران بوود. وەجاران وەتریاس، سەدەی ٢١، قەرن ئازادی ژنەیلە و وە ئازادی ژنەیلە ک ئازادی کوومەڵگە وە دی تێد.
جەنگ جەهانی سێم لە پسا ئەنجام گرێد و ئی باوەتە لە بان ڕۊداوەیل و داڕشانن ڕووژهەڵات ناوەڕاس کاریگەرە، جەنگێگ ک لە لایەن دەوڵەت‌پیاگەیل و ئەڕا خزمەت وە سیستم دژ ژن و جنسیەتگەرا ڕۊ دەید، نەتەنیا داخوازەیل کوومەڵگە و واورێز ژنەیل لە خوەی ناگرێد بەلکێ بوودە مەمەر ئەوە ک ژیانیان بکەفێدە خەتەر.
لە ساڵ ٢٠٢٤، خەڵقەیل و حاکمیەتەیل، فرەتر لە ئەوسا لە وەرانوەر یەکان وسان، هەر چەن سیاسەت جنسیەتگەرا فرە بی، ئەمانێ بەرخوەدانیش فرەتر و فرەتر بی! دەولەت-نەتەوەگان ئاگر جەنگ خوەشتر کەن، کوومەڵگە ئەڕا وەدی هاوردن ئاشتی و دمۆکراسی جەنگیا. ملی گەرایی و دین گەرایی، بینە سەرەکی ترین سیاسەت حاکمیەت، ئەمانگ لە وەرانوەر، کوومەڵگە لە بان بەرابەری و فرەرەنگیەیل نەتەوەیی-مەزهەبی سوڕ بی و وەخوەشیەو ژنەیل دەسپێشخەر ئی پروسەیل ئازادیخوازنە بین. هەڵبەت ک حاکمیەت ئێرانیش لە ئی ڕاوهاتە ئەودەیشت نیە و لە ساڵ ٢٠٢٤، ڕوی هاوردە جەنگێگ بێ‌بەزەییانە وەگەرد کوومەڵگە و دەسپێشخەرەگانێ.
زندانەیل ئێران، گڕێگیش لە هۊژم ڕژیم لە ئەمان نەویە، ئەڕا من و بەشێگ وە زندانیەیل ترەگ، سزای داردان بڕیە، بەشێگ لە ژنەیل لە زندانەگان‌تر، لەوانە زەینەب جەڵاڵیان، لە بۊچکترین و ژیانی ترین مافیان بێ بەشن، ئەمانێ لە وەرانوەر ئی بەرتەکەیل دژ مرووڤیە، دیمن ک زندان، بیە مەکتەو هۊرشە و پارادایم، بیە سەنگەر بەرخوەدان و موبارزە و من و هاوبەندیەیلمان، تواستیم کەڕەتێ ترەگ نیشان بیەیم هەر ڕووژ ئەڕامان ٨ مارسە.
مەیەر بوود، هۊژم بوود و تو پارێزوانی لە خوەت نەکەید؟ مەیەر توانیەد لە وەرانوەر زوڵم و ستەم بێ دەنگ بمێنیەید؟ مەیەر بوود ژان لە ناو چەو مناڵەیل، ژنەیل، جوانەیل و بەشەیل‌ترەگ زوڵم وەلێ‌کریاگ بۊنید و چەوت لە ڕۊ موبارزە بوەسید؟ وە هەتم نە! دیرووک وە ئیمە یای داس ک هەنگاوەیل موبارز، کوورە رێیەیل و بەرزی و نزمی ناناسێد؛ باوش گەرم موبارزەیش ئەڕا ئەو کەسێگە ک دڵێ ئەڕا ئازادی ڕکێد و شەوق باڵەو گردن دێرێد، وازە و ئیمە وە دی هاتێ لە ئی دیرووک پڕ لە بەرخوەدان و موبارزەیم.
چەوەیلمان لە تیەریکترین شوونیش بوود، نووڕێدە دۊر دەسەگان و باوەر دێرم ک ئاسوومان هێمان ڕووژناس. من لە دیار ژنەیلێگم ک هەر سانیەیان پڕ بیە لە موبارزە و بەرخوەدان، هەمان ژنەیلێگ ک ئیمە فێر ئەلفبای موبارزە لە وەرانوەر جەور سەپیاگ کردن.
لە ئێرەوە، دەس گەرم گشت ژنەیلێگ وشارم ک لە پاڵ همێد وە مەزرانن ئاشتی و دمۆکراسی، ئەڕا خوڵقانن ڕووژەیل ئازاد و دۊر لە زوڵم و جەور، موبارزە کەن. وەردەوام هاودەنگ و هامەگەردتان، باوەر دێرم موبارزە شوون و وەخت ناناسید و تا وەخت ڕەسین وە ئازادی و پیرووزبایی ئی ڕووژە لە وەخت و شوونێگ ئازاد، ئەڕا پیرووزبایی هۊرمان گشت ئازادیخوازەیل لە وەرین هەتا ئێرنگە، نەبایس گڕێگیش وچان بێریەد.
بژیەد ٨ مارس
بژیەد بەرخوەدان ژنەیل
وریشە مورادی
زندانی مەحکوم وە داردان
ڕەشەمە ١٤٠٣
هەڵگەردان: س.م
