رووژنامەوانێگ لە شار هەلەوان پارێزگای کرماشان وە مدوو وڵا کردن خەوەر راس لە بارەی کۆرۆنا چڕیاسە دادگای رژیم
وە پای خەوەرێگ ک وە سایت یارسان رەسیە، شارام سەفەری رووژنامەوان و مودیر کاناڵ تلگرامی راوێژ پرس ک خەوەرەیل شارسان هەلەوان/سەرپێڵ‌زەهاو وە ناوێ وڵا کەید چڕیاسە دادگای رژیم ئێران لە شار هەلەوان.
سەرچاوەگە ئێلام کردیە تومەت دریاگە پاڵ شارام وڵا کردن ئامار گرێ دریاگ وە کۆرۆناس و وە ئی مدووە بایس رووژ شەمە بچوودە دادگای رژیم.
جێ وەتنە کاناڵ تلگرامی راوێژ پرس لە ئی ماوە تایوەت و وەشیوەی سەروەخو زانیاری راس مەردمی لە بارەی ویروس کۆرۆنا ئەڕا مەردم وڵا کردیە و ئیمڕووژ وە ئێلام کردن ئامار گیان لە دەس داگەیل شارسان هەلەوان ک رەسیەسە ٦ کەس و تەشەنە کردن ئی ویرۆسە وە مەحەلەی فولادی ئی شارە، مودیر کاناڵەگە چڕیاس و ناوەندەیل رژیم ناخوازن راسیەگان ئەڕا مەردم ئاشکار بوود.
ناکارئامەدی ناوەندەیل رژیم ئێران و پۊترکیان زهنیەت ئەوان بیەسە بایس ئەوە ک نە ئەوەیگە خوەیان ناتوانن کارێگ ئەڕا مەردم بکەن بەلکێ کەسەیل دڵسوز و خاون وژدان ک کارێگ ئەڕا مەردم و رزگاریان کەن لە لایەن ناوەندەیل سەرکوت و هێرشبەر رژیم دەسگیر و رۊوەرۊ هێرش بن.
