شەورای وەڕێوەبەری پلاتفۆرم یارسان: هێمان زهنیەت داگیرکریاێ لە کوردستان قوروانی گرێد
هێمان زهنیەت داگیرکریاێ لە کوردستان قوروانی گرێد
چەن رووژ وەرجە ئیسە چوارمین ساڵڕووژ گیانبەختکردن دو تێکووشەر باشووری «کەماڵ شێخ سادە» و «سدیق ساڵی ئاوایی» بۊ، ک وە زهنیەتێگ کوردستانی لە باشوور کوردستان ئەڕا رووژهەڵات کوردستان خەبات و تێکووشانێگ بێ وچان ئەنجام دان؛ ئەمانێ ئی دو تێکووشەر چوار ساڵ وەرجە ئیسە کریانە ئاماج و هەر دو کەسیان ترۆر کریان. ترۆر کریان تێکووشەرەیل کورد درێژە دێرێ و لە دیرووک کوردستان سەدان رووڵەی قارەمانێ لە لایەن دژبەرەیلیان چ کەسەیل غەیر کورد و چ کەسەیل وەکرا گیریاێ کورد، وە زهنیەتێگ چەپەڵ ترۆر کریانە و یە بۊەسە گیچەڵێگ ئەڕا کوومەڵگایەیل کوردستان.
لە ناو رووژەیل وەرین کاک «موستەفا سەلیمی» ک ماکوم وە ئێدام بی و لە شوون شووڕش زندان سەقز توانستۊ دەر بچوود، لە لایەن ترۆریزم دەوڵەتی ڕژیم ئێران وە سێدارە دریا. ئەمانێ خەوەرەیل ئەی ڕۊداوەێ دڵتەزینە لێڵ و ناڕووشن بۊن: لە یەێلا باس لە ڕادەست کردنی وە رژیم توتالیتاریست ئێران لە لایەن «یەکیەتی نیشتمانی» کریا، و لە لاێگ ترەک خەوەرەیل تر باس لە ڕادەس کردن شادڕەوان «موستەفا سەلیمی» لە ئاوایێگ لە شارسان بانە کردن. لە ئێردا خاڵێگ ک جێ باسە و گلە وە گلەی گەل کورد بایس وە پێ ویر بکەن و ئەڕایان جێ پرسیار بووت، ڕادەس کردن رووڵەێ کورد وە رژیمێگ داگیرکەرە ک وە دەس کەسەیل کورد ئەنجام گردیە.
ڕادەس کردن رووڵەێ کورد چە لە لایەن «یەکیەتی نیشتمانی» و چە گوزارشت دان ئەو کەسە لە لایەن کەسێگ لە ئاواییێگ لە شارسان بانە، هەڵەوگەردێ ئەڕا زهنیەتێگ داگیرکریاێ ک خوەی خستیەسە خزمەت بێگانە و تۊیەم بێ ئرادەیی لە ناو کوومەڵگا وەشنێدن. راسە ئێرەنگە کوردستان لە لایەن داگیرکەرەیل بۊەسە چوار بەش، ئەمانێ نەبایەد لە ویر بوەیمن ک کوردستان ئەڕا ئیمەی کورد نیشتمانێگ لەیەک دانەبڕیایە و گشت خەڵک کورد لە باشوور و رووژهەڵات کوردستان پەیوەندیەیل کوومەڵایەتی و نیشتمانی ڕاسەگانی و سەخت دێرن و هەمیشە لە رووژەیل تەنگ وە فریاێ یەک ڕەسینە؛ لە ئاوارەیی خەڵق باشوور ئەڕا رووژهەڵات و نیشتەجێ بۊنیان، هەتا یارمەتی دان خەڵق لێ قوومیاێ کرماشان لە لایەن خەڵق باشوور کوردستان و سەدان نموونەێ ترەک ک لە هۊر هەر کوردێگ مەنیە.
جیا لە ئیە و هەر لە چوارچوەی زهنیەت داگیرکریاێ، دۊەکە فڕووکەیل ڕژیم فاشیست تورکیە «کەمپ پەنابەرەیل شەهید روستەم جوودی» و ناوچەی «زین وەرتێ» وە زانیاری دان جیرەخوەرەیل و پارت دموکرات کوردستان عێراق بمواران کردنە ک لە ئاماج ئی کردەوەێ قیزەوەنە سێ ژن گیانیان لە دەس داس و لە «زین وەرتێ» سێ گەریلای هێزەیل پارێزین گەل هەپەگە ک لە سێ بەش رووژهەڵات، باشوور و باکوور بینە شەهید بینە. ئیەیگە جێ نگەرانی گشت گەل کوردە ک شەڕ ناوی و براکوشی تازەێگ لە ناو گەل کورد وە ئارا باێد. حزب دموکرات و بنەماڵەی بارزانی چۊ بەرپرسەیل ئەی کردەوەیلە وە ئەژمار تیەن و بایەد بزانن گەل کورد وە هۊچ جوورێگ هانە خەیانەتێگ قەبول ناکەێد.
ئیمە وە جوور پلاتفۆرم یارسان ڕادەس کردن تاک کورد لە لایەن هەر شەخس و یا حزبێگ وە هۊچ شێوەێگ قەبول ناکەیم و لە سەر ئەی باوەریم ک ئەنجام دریان هانە کردەوەیلێگ خزمەت موستەقیم وە داگیرکەرەیل وڵاتە و سەرچەم لە زهنیەتێگ داگیرکریای و دۊر لە ئەخلاق کوردی و زاگروسی گرتیە. هەروەیجوورە ئێدام کردن رووڵەی کورد «موستەفا سەلیمی» لە لایەن رژیم فاشیست مەزهەبی ئێران شەرمەزار کەیم و ئێدام وە کردەوەێگ دژەئنسانی و دۊر لە ئەرزشتەیل ئنسانی وە ئەژمار تیەریمن. هەم خیانەت نانەتەوەیی و هەمیش فاشیزم ڕژیم هەژاری و سێدارەێ ئسلامی لە لایەن ئیمە شەرمەزارە، هەروەیجوورە بومواران ناوچەیل کوردستان لە لایەن تورکیە وە تونی شەرمەزار کەیم، رێ نیشان دان وە داگیرکەرەیل خەیانەتێگ دیرووکیە و تەنیا وە دۊری کردن لە هێڵ خیانەت، تێکووشاێن دژ وە ڕژیمەیل فاشیست ئێران و تورکیە و ڕاوساێن لە بەرەێ خەڵقمانە ک توانیمن خەسپەن خوەمان لە شووڕش گەورەی کوردستان وە جێ باریمن.
شەورای وەڕێوەبەری پلاتفۆرم یارسان
