زندان ماڵ دوێم ژنەیل؛ بەهار ئاورین

خولاسە و هەڵگەردان: ساسان مێهرابی

وە نووڕینێگ کوڵ،عومر چل و یەک ساڵەی رژیم ئێران دیار بوود ک ئەو نزامە لا وردن رخنەگرەیل و کوشتن موخالفەیل و چالاکەیل کردیەسە بنەمایگ ئەڕا مەندن خوەی ، ئەڕا ئەوەیگە کەس نەتوانێ دژ وە رژیم بوسێ و حکومەتێگ توتالیتار و دیکتاتور بونیاد بنەید. ترۆر پلانگەری و لە ناو بردن شێواز بەدەنەی موخالفەیل یەکێگ لە بنەمایەیل ئیدئولوژی رژیم ئێرانە. هەروەیجوورە تەوبە و ئعتراف وە زوور یەکێگە لە ئەو کردەویل حکومەت ک هەمیشە لە وەرانوەر موخالفەیل و حەق خوازەیل گرێدە وەر.

دادگای چەن دەقەیی، شکەنجەی رووژانە، ئێدام کردن هەزاران کەس و کوشتن هەڕەمەکی، بەشێگ وەرچەو لە پایماڵکاری ماف بەشەرە ک لە ئێران ئەنجام گرێ، ئێدام دەهەی ٦٠ خاڵێگ سیەس لە ناو چەوەیل دەزگای قەزایی ئێران ک هەتا ئیسە تەسیر ئەو جنایەتە لە بان فکر کوومەڵگای ئێران مەندیە.

رژیم ئێران لە چوارچوەی وەهێز کردن بنەوای دەسەڵات و ئەڕا درێژە دان وە هەژمونی خوەی لە دەیشت مەرزەگان ئێرانیش لە هویچ جنایەتێگ سڵ نەکردیە.

یەکێگ لە کردەوەگانێ ئەڕا گارانتی مەندنێ لە دەسەڵات دیکتاتوری تونوتێژیە، دەسەڵات ئێران لە ئەو حکومەتەیلەسە ک ئەڕا سەرکوت موخالفەیل گشت کردەوەیگ ئەنجام دەید، بیێن زندانییەیل سیاسی لە سیستمێگ مانای ئەوەسە ک لە ئەو سیستمە ئازادی دەنگ وجوودێگ نەیرێ و رێز لە ماف ئەو کەسەیلە ناگیریەت ک هەڵگر فکر جیاوازن.

وەرپرسەیل رژیم ئێران وە درێژایی ساڵەگان ئنکار بیێن زندانی سیاسی کردیە، ئەڕا ئەوەیگە سزای سیاسی لە ئێران وە رەسمیەت نەناسریەت وە جوور تاوان ئەمنیەتی ناویان بەید، سەربار بیێن زندانەیل تەرسناک ئەڕا موخالفەیل، حکومەت فرە جار ئاشکەرا و بڕێگ جار زندانییەل ئێعدام کەید، ئەڕا ئەوەیگە کوومەڵگا چەوترسن بکەید.

لە سیستم قەزایی ئێران وە ئەو کەسەیلە ک چالاکی سیاسی ئەنجام دەن تومەت موحاربە، موفسد فی ئەلرز، ترۆریست، تەجزیەتەلەب و دەیان تومەت ترەک وە پێ چەسپنن، ئەڕا ئەوەیگە کوشتن، شکەنجە و لە ناو بردنیان وە ڕەوا ناو بوەن.
ئاماج سەرەکی شکەنجەگەرەیل ، بێبەشکردن قوربانی لە هویەت، وە تایوەت هویەت سیاسی، تا رادەیگ رێ داشتوین کوشن، بێجگە ئەوە زندانییەیل سیاسی بێ ئرادە کەن و وە ڕێ شکەنجە، هەڕەشە و ترسانن تەقالای پەشیمان کردنێ دەن.

لە ئیجوور رەوشێگ ک زندانەیل ئێران کریاسە شوون شکەست ئرادە و پاوەگەزدان، ژن بیێن و لە پاڵێ سیاسی بیێن مەسئەلەیگ ترەگە، ک سەربار گشت گیچەڵەگانێ، نماد تێکووشان و پاوەگەزدان دژ وە نزام پیا سالار و دژ وە ژن حکومەت وڵات فەقیە، وە زوانێگ سادەتر زندان ماڵ دوێم ژنەیلە، ئەو جیاکاریە ک کوومەلگا رویوەرویان بوودوە، لە ئاستێگ فرەتر لە زندانەگان لە سەریان پەیرەو کریەد.

حکومەت ئێران لە دەسپێگ هاتنە سەر کارێ دوژمنایەتی خوەی وەگەرد ژنەیل نیشان دا و وە ئستفادە لە دین، شەرع و قانونەیل ئسلامی و ئیدئولوژی، ژنەگان خستنە ژێر فشار و لە زندانیش، زندانییەل ژن رویوەروی شکەنجە و دەسدرێژی کردنە، کارنامەی سیەی رژیم ئێران لە بارەی زندانییەیل سیاسی ژن، فرە ترسناکە و چوارچوەیگ لە رادە وە دەر دێرێ، دەسدرێژی سکسی، بێرێزی، شکەنجەی رۆحی، جسمی و هیشتنێ لە زندان لە ئوتاق تاکەکەسی، بەشێگە لە کردەوەیل رژیم ک وەرانوەر وە زندانییەیل ئەنجام دەید.

هەر چەن ساڵانێگە حکومەت ئێران لە ژێر ناو پارێزین ئەمنیەت ملی، کەسانێگ فرەیگ لە زندانەگان شکەنجە کردیە و ژمارەیگ زندانی ئێعدام کردیە، رژیم ئەو جوورە هالی بیە ک زندان شوون شکاندن ئرادەی ئایەم تێکووشەر، ئەمانێ بەڵگەیل شاهدی ئەوە دەید ک زندان شوون ئسلاح ئایەمەیل نیە بەلکێ شوون ئەندیشە و ڕامانە.

رژیم ئێران وەردەوام لە وەرانوەر زندانییەل کورد سیاسەت ئنکار ئرادە و هویەت گردیەسە وەر، سیاسەتێگ ک هەر لە دەسپێگ شۆڕش گەلان و دوای قورخ کردن ئەو شۆڕشە وە فەتوای خومەینی، هێرش لە سەر کوردستان و گولەواران جەوانەیل دەسوەپێ کرد، ئەمانێ وەردەوام ئەو جنایەتەیل رژیمە، نەتوانست گەل کورد و شۆڕشگەرەیلێ لە تێکووشان ئازادیخوازانە و درێژەی رێ و رێباز شەهیدەیلە پەشیمان بکەید، وە ئی مدووە دێر یا زوی نزام دیکتاتور خوسرەوانی ئێران بوودە ئاشغاڵدانی دیرووک و هەر ئی فەرزاد و شیرینەیلە توانن ساختار ئەو دەسەڵاتە بڕمنن و ئەڕا هەمیشە کوتایی وە ئەو دەسەڵاتە بارن.