پلاتفۆرم یارسان: یاێ و هۊرمان سێ یار ئاگروەگیان، نیکمەرد تاهری، موحەممەد قەنبەری و حەسەن ڕەزەوی بەرز ڕاگریمن

یاێ و هۊرمان سێ یار ئاگروەگیان، نیکمەرد تاهری، موحەممەد قەنبەری و حەسەن ڕەزەوی بەرز ڕاگریمن

هەفت ساڵ پێش، لە ڕووژەیلی ک ئێران و ڕووژهەڵات کوردستان وە تازەیی تئاتر هەڵوژانن ڕەژیم پێشت سەر هیشتۊ، و گجا باس لە «ئۆمید و تەدبیر» بۊ و دکاندارەیل سیاسەتەیل ئستێعماری ڕەژیم لە ناوچەیل جووراوجوور لەواێ کرماشان، لوڕستان، ئیلام، هەمەدان و قەزوین سەرقاڵ خەڵەتانن مەردم لەوارەی پرۆژەیل دەوڵەت ڕووحانی و بانان ڕەژیم ئسلامی بۊن، کارەساتێگ پێش هات ک دەس ڕەژیم ڕۊ کرد و نیشان دا ک پرۆپاگانداێ هازەیل ڕەژیم بجگە لە دروو چشتێگ نییە و هۊچ «تەدبیر» و «ئۆمید»ێگ لە ئارا نییە. ئەی کارەساتە وە قیمەت گیان سێ جوان تێکووشەر و سێ گوڵ سوور خەڵق یارسان تەمام بۊ. لە ڕووژەیلێگ ک دەسگاێ میدیاێ سەرمایەداری ئسلامی گووش مەردم لە وادەیل دروو پڕ کردیات و ئەڕای کیشاننیان وە پاێ سەنووقەیل ڕای دەس وە هەر فەن و تەرفەنێگ دیات، سێ یار جوان چۊ سێ پەپریک ڕێگاێ ئازادی و یەکسانی خوەیان وە ئاگر سپاردن و وە فدا کردن گیانیان نیشان دان ک وادەێ «تەدبیر» و «ئۆمید» سەران ڕەژیم چشتێگ بجگە دروو نییە و ئەوەی ک لە ڕاسییا ها لە ئارا، هەر وە تەنیا نایەکسانی و خەفەقان و فاشیزم ڕەژیم سەرمایەداری ئسلامییە. ئقدام سێ یار ئاگروەگیان ئەگەرچە وە ڕواڵەت وە باوەر دینی ئەنجام گیریا، وەلێ لە ناخ خوەی ئقدامێگ دژ وە نابەرابەری و دوبەڕەکی و چەن دەهە ئنکار شووناس خەڵق یارسان بۊ، و هەر وەی مدووە خاوەن جەنبەێ سیاسییە و نەبایەد هەر وە تەنیا چۊ کردەوەێگ دینی وە ئەژمار باێت، بەڵکە بایەد مزنە وە یە بگیریەێت ک ئەی کردەوە کارێگ سیاسییە و ئاکامەیل سیاسییش داشتییە.

هەفت ساڵێگ ک لە دۊاێ گیان باخت کردن سێ یار ئاگروەگیان لە سەر خەڵق یارسان ویەریایە، ساڵەیل پڕ بایەخ و دیرووکسازێگ بۊە، چناوکە توانیمن لەو کارەساتە چۊ ڕۊداوەێگ ناو بوەیمن ک دیرووک سیاسی یارسان دابەش کەێد وە وەرجە خوەی و دۊا جە خوەی. جگە لە نەخشێگ ک ئەی ڕۊداوە لە ئاشکراکردن دیم و دەمچەو ناشرین ڕەژیم و سیاسەتەیل ئستێعماریی داشتیە، دۊاێ ئەو کارەسات ئەڕاێ یەکەم کەڕەت وە چەو دیمن ک خەڵق یارسان ئەڕاێ پاراستن ماف خوەی هاتە سەر خیاوانەیل و لە جمشتێگ ئاشتیخوازانە وە ماوەێ چەن مانگ حەقخوازی کرد و ئەڕا یەکەم کەڕەت بی هۊچ لوکنەت زوان و تارفێگ سیاسەت ئنحسارگەری ئایینی و دەنگکپکردن و سەرکوتکردن کەمینەیل دینی وە پرسیار کیشا؛ ئازادی دینی چۊ خوازیاری خوەی ئێعلام کرد و گرینگتر لە گشتیان وە شێوەێگ مەردمی دەس وە ڕێکخستن خوەی دا. ئەی جمشتە ئەوقەرە گەورە و لە سەر سیاسەتەیل ڕەژیم کارگەر بۊ ک سەران و دەسەڵاتدارەیل ڕەژیم جوور لاریجانی و یوونسی و … ترسان و کیشانیان وە کرماشان تا وە لابی کردن بتوانن وەر جمشت مەردمی خەڵق یارسان بگرن و لە ڕێ خوەی لاری بکەنەوە. وە داخوە دیمن ک بڕێگ لە کەسانێگ ک ناو «پیر» یا «سەید»یش وە ملیان بۊ، لە لابی کردن وەگەرد دەسەڵاتدارەیل ڕەژیم هەر وە تەنیا بەرژەوەندییەیل تاکەکەسانە یا بنەماڵەیی خوەیان لە وەر چەویان بۊ. ئەی کەسەیلە پێشت وە خەڵق یارسان کردن و لە خیانەت وە خۊن سێ یار ئاگروەگیان، تەنانەت لە وادەیل ڕیفۆرمیستی و سەرەتاییش کووتا هاتن و وە تێکەڵ کردن ڕێبەرایەتی ئایینی و ڕێبەرایەتی سیاسی نەهیشتن کوومەڵگاێ یارسان خوازیارییەیل ڕاسەگانی خوەی ئێعلام بکەێد و بتوانێد ئەی جمشتە بکەێد وە هەنگاوێگ ئەڕاێ نووسازی و ساغکردن ساختار سیاسی کوومەڵگا. وە داخەوە تێکەڵ بۊن ئایین و سیاسەت وەر جمشتەگە گرت و ئیە گەورەترین دەرسێگە ک توانیمن لە کارەسات گیان باخت کردن ئەو سێ شەهید یارسان بگریمن، ک بزانیمن ڕێبەرایەتی سیاسی کوومەڵگاێ یارسان بایەد لە دەس هازەیل مەردمی و چین بندەس و خوەسەر کوومەڵگا بوود و ئیە تەنیا وە نووسازی و دمۆکراتیزە کردن پەیوەندییەیل کوومەڵایەتی پووڕێد و وە ساختار پێش-مودێرن سیاسی ک لە ئاکام سیاسەتەیل ڕەژیمەیل داگیرکەر کوردستان و لوڕستان و ئازەربایجان تا وە ئیرەنگە وەهاز مەنیە، ناتوانیمن جمشتێگ ئازادیخوازانە و مەردمی وە ئامانجەیل خوەی بڕەسنیمن. بجگە یەیش وەختێگ ک بڕێگ کەس تەنیا وە پایەێ جێگاێ بنەماڵەیی و میراتی خوەی خەت خیانەت وە پێش برد، دی ئەڕاێ گشت ڕووشن بۊ ک وە تایفەخوازی و بنەماڵەخوازی ناتوانیمن لە مەیدان خەبات سیاسی ئەڕاێ ئازادی و یەکسانی هەنگاو بنەیمن و نووسازی کوومەڵگاێ یارسان کە مەرجێگ گرینگ و بنەمایی ئەڕاێ ئازادی و یەکسانییە، هەر وە تەنیا وە لاوردن بەرژەوەندییەیل تایفەیی و خاندانی و ئێڵی و عەشیرەتی پووڕێ و مۆمکن بووت.

ئەگەرچە ئەی خیانەت لە وەراێوەر سێ یار ئاگروەگیان کریا، وەلێ جمشت مەردمی لە هناس نەکەفت و وە شێوەیل ترەک لە ساڵەیل پاشین خوەی نیشان دا و لە خوەپێشاندانەیل دژ وە داعش و پێشتگیری کردن خەڵق یارسان و مەردم کرماشان و هەلەێوا بەشەیل ترەک ئێران لە واوەسەێ کۆبانی و پێشتگیری کردن لە خەڵق ئێزدی لە وەراێوەر داعش و خیانەتکارەیل، دەنگ ئازادیخوازی کوومەڵگاێ یارسان دوارە بەرزەو بۊ. لەوارەێ حکوومەت ناوەندی ئێرانیش خەڵق یارسان وە ئەی ئاگادارییە ڕەسیا ک وادە دانەیل هەڵوژاننی و دروو و دەڵەسەیل جێگاێ ئێعتماد نییە و خەڵق بجگە لە خوەی و هازەیل خەڵقی نەبایەد وە هۊچ هاز ترەکێگ پێشت بوەسێدن.

هەفت ساڵ دۊاێ گیان باخت کردن سێ یار ئاگروەگیان، نیکمەرد تاهری، موحەممەد قەنبەری و حەسەن ڕەزەوی یاێ و هۊرمانیان بەرز ڕاگریمن و ڕێگاێ ئەوانە ڕێگاێ ئازادی و یەکسانی زانیمن. هەلەێوا لە شەهیدەیل ترەک کوومەڵگاێ یارسان لە تەیموور بانیارانی ک لە وەراێوەر ڕەژیم قاجار و دەسەڵاتداری دوڕیل ئایینی و سیاسی سەردەم خوەی واوەسە کرد، تا شەهیدەیل یارسان لە شووڕش ١٣٥٧ و شەهیدەیلێگ ک دۊاێ شووڕشەگە وە دەس کوومار ئسلامی گیان خوەیان باخت کردنە جوور حەسەن مەقسوودی، دەوریش براگەورە، خەسرەو پەناهی تۊشامی، سۆهراب غوڵامی، ئێرج بووزەرجومێهری، مەحموود خامووشیان، سەید قوربان حوسەینی، سەید فرەیدوون پدروود، سەید خەلیل عالینەژاد، قارمان سۆهرابی (شاهین داڵاهوو)، شارام ڕۆستەمی (زاگروس بەرزەوان) و هەلەێوا گشت گیانباختکردییەل خەڵقمان وێنەێ شلێر فەرهادی، کیانووش ئاسا، حکمەت سەفەری، پووریا ناسریخا و … یاێ کەیمن و ئامانج و ئارمان ئەی شەهیدەیلە جوور ئامانج و ئارمان خەڵق یارسان زانیمن. وە باوەر ئێمە بجگە دەسەیل پڕهاز و توان ڕووڵەیل خەڵق دەسی ترەک ناتوانێد خەبات و تێکووشاێن ئەڕاێ ئازادی و یەکسانی وە پەرتخ بڕەسنێد.

پلاتفۆرم یارسان ١٣٩٩/٠٣/١٣