کەژار: خاونداریەتی لە دەنگ و ئێرادەی ئازادیخوازی زەینەب جەڵاڵیان بکەیم
خاونداریەتی لە دەنگ و ئێرادەی ئازادیخوازی زەینەب جەڵاڵیان بکەیم
ئەوجوورە گ زانیمن فرەتر لە مانگێگە زندانی سیاسی کورد زەینەب جەڵاڵیان لە زندان خۆی سەر وە ئوستان ئورمیەی رووژهەڵات کوردستان لە لایەن هازەیل ئەمنیەتی رژیم ئێسلامی ئێران کل کریاسە زندان قەرچەک وەرامین.
ئەڕا هەر‌کەسێگ ئاشکارە ک زندان قەرچەک وەرامین، یەکێ لەو زندانەیلەسە ک نە لە بوار ئەمنیەتی و نە لە بوار تەندوروستی، هۊچ گارانتیێگ ئەڕا پارێزین گیان زندانیەگان وەتایوەت زندانییەیل سیاسی نەیرێد. وەوشیوە سیستم سەرکوتکەر و چەوترسنکەر رژیم ئێران، ئەڕا بێدەنگ کردن و تەسلیم کردن ئێرادەی سیاسی و ئازادیخوازانە، ئەو زندانە وەجوور تەبعیدگاێ زندانییەیل سیاسی وەتایوەت ژنەیل زندانی وەکار تیەرێد.
وەتایوەت لەی وەختە ک وەخاتر خەمسەردی کاروەدەسەیل ئێران و نەوین خزمەتگۆزاری سەرەتایی ئەڕا هاووڵاتیەگان، هەواپەتای کۆرۆنا لە گشت ئێران بەڵاو بیەسەو، هاووەخت لە زندانەگان هەرچێ تیەد فرەترەو بوود و بێەسە خەتەر جدی ئەڕا لەناوبردن زندانییەیل سیاسی لە زندانەگان ئێران گ وەداخەو زەینەب جەڵاڵیان تۊش ئی ویرۆسە کریاس، ڕەوش تەندرۆستیێ خەراوە و گیانێ ها لە خەتەر، هەر وەیجوورە لە لایەن ئێدارەی ئێتڵاعات ئەڕا هەناردنێ وە نەخوەشخانەی دەیشت زندان و چارەسەری پزشکی نواگیری کریاس، بێگۆمان ئێ ویرۆسە بیەسە وەسیلەی سیاسەت قڕ کردن کۆمار ئێسلامی ئێران.
ئیمە زانیمن وە ساڵان دەوڵەت ئێران گشت تەقەلای خوەی ئەڕا لە ناوبردن کەسایەتیەیل ئازادیخواز کردێە، چویگە زانێد وەخاتر سیاسەتە هەڵەگانێ وە درێژایی حۆکمڕانی خوەی لە سەر گەلان ئێران وەتایوەت ژنەیل، لە وەرانوەر ئەو قەیرانەیلە سەرکەفتێ نەیۊە.
لە وەرانوەر ئەو قەیرانەیلە ک لە ئەنجام سیاسەتەیل هەڵەی گشت کوومەڵگە گردیەسە وەر بێ‌چارە مەنێە و دی کوومەڵگەیش تاقەت ئەو قەیرانەیلە نەیرێد و هەرچێ تێد دەنگ ناڕەزایەتی گەلان لە وەرانوەر ئەو رەوش ناڵەبارە فرەترەو بوود.
وەبێ گومان فشارەگان دەوڵەتیش لە وەرانوەر ئەو ناڕەزایەتیەیلە فرەترەو بوود؛ وەتایوەت زندانییەیل سیاسی ک گیان خوەیان کردنەسە قەڵخانێگ ئەڕا پاریزین ئێرادەی سیاسی گەلان. هەر وەی خاترەسە ک ئیمە هەوەجە دیریم خاس بزانیمن لازمە لەو کەسەیلە ک لە زندانەگان رژیم ئێران ئێرادەی سیاسی و دەنگ ئازادی خوازی گەلان وە تایوەت ژنەیلن خاونداری بکەیم. هاووەخت ئیمە وەجوور گەل، وەتایوەت وەجوور ژن، وە گشت شێوازێگ خاونداری لە ئێرادەی خوەمان بکەیم و وە ڕووح هاوکاری ئێجازە نەیەیم ئەو دەنگ ئازادیخوازیە کپەو بکریەید، وەخاتر ئەوە ک بوین ئیمە گرێ دریاسە بوین ئەوان.
ئیمە وەجوور کەژار لە گشت هازەیل ئازادیخواز، کۆمەڵگەی مەدەنی، ڕێکخراوەیل ماف بەشەر، ڕێکخراوەیل ژن و کەسەیل خاون وژدان داوا کەیم ک لە وەرانوەر رەوش زندانییەیل سیاسی لە زندانەگان ئێران وە تایوەت زەینەب جەڵاڵیان بێدەنگ نەمێنیەن. چۊیگە بێدەنگی لەی‌بارە بوودە بایس ئەوە ک خەتەر لە سەر ژیان باقی زندانییەیل سیاسی‌یش فرەترەو بوود.
کوومەڵگەی ژنەیل ئازاد رووژهەڵات کوردستان (کەژار)
