ئاگرکەفتنەوەی ناوچەیل بوزین و مەڕەخێڵ پاوە هەمرای درێژە دێرێ
وە پەی خەوەرێگ ک وە سایت یارسان رەسیە، لە رووژ پەنجشەمەی هەفتەی وەرین ئاگرکەفتنەیگ لە ناوچەیل بوزین و مەڕەخێڵ پاوە دەسوەپێ کردیە ک لە ئێوارەی شەمە وە تەقالای چالاکەیل و ژینگەپارێزەگان کونترول کریا ئەمانێ لە ساعەت یەک شەو یەی شەمە ئاگرکەفتنەوە لە ئەو ناوچەیلە ئەڕا جارێتر دەسوەپێ کرد و هەتا ئیسە نەتوانریاس ئاگرەگە کونتروڵ بکریەد.
سەرچاوەگە وەتیە، ئاگرکەفتنەوەگە بەش فرەیگ لە دارسان و سروشت سوزانیە و زەرەر و لەتمەی فرەیگ داس لە ناوچەگە،
هەروەیجوورە هەتا ئیسە فرەتر لە پەنج مین چنریای سپای پاسدارەیل رژیم داگیرکەر ئێران لە ناو ئاگرەگە تەقیاس و ئەگەر هاتنە ئارای کارەسات تر ها لە ئارا.
سەرچاوەگە ئێلام کردیە، سێ کەس لە کارمەندەیل ئدارەی ژینگە تۊش سوزیان بینە ک ناو دو کەسیان موعینی و خوسرەوی ئێلام کردیە.
هەرلێوا لە ئاگر کوشانن ئەو ناوچە ئەندامەیل ئەنجومەن ژینگە پارێزی ژیوای پاوە، ئەنجومەن ماپریس و کۊەوانەیل جوانرۆ و پاوە بەشدارن و تەقالای کوشانن ئاگرەگە کەن.
جێ وە وێر هاوردنە ک لە وەخت کوشانن ئاگر ناوچەیل بوزین و مەرەخێڵ لە رووژ ٨ پۊشپەر سێ چالاک ژینگە وە ناوەیل موختار خەندانی، بەلال ئەمینی و یاسین کەریمی شەهید بین.
