دەستەی وەڕێوەبەری پلاتفۆرم یارسان: ئاماج لە ترۆر دوکتور قاسملۆ وە ئاماج گردن رەوت بەرابەریخوازی بی
ئاماج لە ترۆر دوکتور قاسملۆ وە ئاماج گردن رەوت بەرابەریخوازی بی
رووژ ٢٢ پۊشپەر ١٣٦٨ هەتاوی وەرانوەر وە سێنزە مانگ ژوئیەی ساڵ ١٩٨٩ زایینی لە وەختێگ ک شەهید دوکتور عەبدولرەحمان قاسملۆ ئەڕا دیدار وەگەرد نمایەندەیل رژیم ئێران لە ڤیەن ئوتریش ئەڕا چارەسەری گیچەڵ کورد خەریک گوفتگو بی کریا ئاماج هێرش و ترۆر کریا.
ترۆر دوکتور قاسملۆ و هاوڕێیەگانێ لەکەیک سیە بی ئەڕا رژیم داگیرکەر ئێران و هەڵەوگەردیانێگ لە نووڕین گەل کورد وە پرۆسەی چارەسەری گیچەڵ کورد لە رووژهەڵات کوردستان و تەنانەت بەشەیل تر کوردستان، شەهید قاسملۆ ئەڕا گەلێک ک ماف بەرابەر وەلێ سەنیاس و خوازێ وە دەسێ بارێ چوودە کۆبینەوە ئەمانێ دوژمن وە جوور خۊنەوخوارەیگ چەو لە کورد کەید و لە سەر بنەوای کوومەڵکوش کردن گەل کورد تێدە کۆبینەوە و ئاماجێ قەبول نەکردن ماف کورد و تەنانەت هەڕەشەیگ لە بەشەیل تر کوومەڵگە دەس وە ترۆر دەید.
بێ گومان شەهید قاسملۆ یەکێگ لە ڕێبەرەیل گەورای گەل کوردە و لە دەورانێگ لە دیرووک تێکووشان بێ وچانێگ ئەڕا ئازادی، بەرابەری و وەدەس هاوردن ماف رەوای گەل کورد ئەنجام داس ک جێ دەسێ لە دیرووک و لاپەرەیل کتاوەیل تومار بیە.
ئێرەنگە لە ناو دەوران و رەوشێگ جێ گردیمنە ک کوردستان وە گشتی لە ژێر ئاگر و پەلامارەیل دوژمنەیل جێ گردیە، رووژانە رووڵەیل قارەمان گەلمان ئەڕا نیشتمان و ئازادی گیان خوەیان فەدا کەن، ئەیەر بنووڕیمنە دوژمنەیل خوەمان دوینیمن ک لە گشت بوارەیل دژ وە یەکن و هەڕەشە لە یەک کەن ئەمانێ ئەڕا مەسئەلەی گەل کورد جوور برای بەش نەکردێ وەگەرد یەک لەسەر یەی سفرە دانیشن و پلان دژ وە گەل کورد داڕشنن ک ئیە خوەی پەیامێگ وە ئی مانا دەیدە گەل کورد، ک یەکیەتی لە گشت چشتێگ واجبترە، یەکیەتیێگ لە گشت پێکهاتەیل، باوەریەیل، رەنگەیل و دەنگەیل نیشتمان پەروەر و دموکراتیک گەلمان.
لە ٣١مین ساڵرووژ ترۆر کریان شەهید دوکتور قاسملۆ یاد گشت شەهیدەیل رێ ئازادی وە تایوەت شەهیدەیل کوردستان وە وێر تێریم و پەیمانمان دووارەوە کەیم تا ک لە کوردستانێگ ئازاد ژیان نەکەیم بێ وچان تێکووشان درێژە بیەیم، هەرلێوا باوەرمان ئەوەسە ک ئازادی گەل کورد لە یەکیەتی ناو ماڵ خوەی وە دی تێ و لە ئەو رێوە ئازادی گەل کورد و گەلانتر زمانەت بوود.
دەستەی وەڕێوەبەری پلاتفۆرم یارسان
2020/07/13
