بەشدار ئمزا کردن کەمپەین ئازادی ئەڕا زەینەب جەڵاڵیان بن
ئیمە دەنگ زەینەب جەڵاڵیانین
زندانی سیاسی کورد زەینەب جەڵاڵیان ساڵ ١٩٨٢ زایینی لە شار ماکۆ پارێزگای ئورمیەی رووژهەڵات کوردستان لە داڵگ بیە. لە شوون ماوەیگ کار و چالاکی سیاسی، لە ساڵ ٢٠٠٧ وە پارێزگای کرماشان لە لایەن هێزەیل ئتلاعات سپای پاسدارەیل کۆمار ئسلامی ئێران دەسگیر کریا. لە وەخت دەسگیر کردنێ بێ رێزی وە پێ کریاس و رویوەروی شکەنجەی جسمی و رەوانی بیە. ناوبریاگ وە بێ وەکیل و گوزەریان پرۆسەی قانونی، لە دادگای ئنقلاب ئێران و لە رەوشێگ ئەمنیەتی و وە شیوەی فورمالیتە لە چەن دەقە، سزای ئێدام وە سەرێ داسەپیا، لە شوون چوار ساڵ پافشاری زەینەب جەڵاڵیان لە بان رەدکردن تومەت موحاربە و هاووەخت دەنگدانەوەی پەروەندەی زەینەب جەڵاڵیان وە ناوەندەیل جەهانی، سزاگە گووڕیا هەتا هەتایی. جێ وە وێر خستنە ک زەینەب جەڵاڵیان یەکم ژنە لە ئێران ک سزای زندان هەتاهەتایی وە سەرێ داسەپیاس.
رەوش تەندروستی:
سێنزە ساڵە زەینەب جەڵاڵیان لە لایەن دادگای ئنقلاب ئێران و سپای پاسدارەیل لە ژێر سەخترین شکەنجەی جسمی و رەوانیە و وە ئەو مدووە ژیان و تەندورستی زەینەب جەڵاڵیان لە خەتەرە. هەروەیجوورە، وە مدوو شکەنجە و نەوین ماف دەرمان، تا رادەیگ فرە چەوەیلێ کز بیە و هەو کردیە. لە ئی ئاخریشە وە مدوو کەمتەرخەمی بەرپرسەیل زندان، تویش ویرۆس کۆرۆنا بیە، وە ئی هالیشیە ماف وەرگردن چارەسەری وە لێ زەفت کریاس ک ئیە سەرباردرێژە داشتن شکەنجەی جسمی و رەوانیە.
پەروەندەی زەینەب جەڵاڵیان:
لە بارەی پەروەندەی زەینەب جەڵاڵیان سەربار تەقەلای رێکخراوەیل ماف مرۆڤ، ئەمنستی، نەتەوەیل یەکگردێ، شەبەکەیل ماف مرۆڤ ئێران و کوردستان، چالاکەیل سیاسی و مەدەنی و … کۆمار ئسلامی بەردەوام فشارەگانێ ئەڕا سەر زەینەب فرە کردیە.
رووژ ٢٨ مانگ وەرین وە بێ خەوەردار کردن خانەوادەگەی، ناوبریاگ ئنتقاڵ دریاس و لەشوونێ روین بی ک هەناریاسە زندان قەرچەک وەرامین و لە ئاکاما تویش کۆرۆنا بیە و لە پرۆسەی دەرمان وە پشت گوش خریاس ک ئیە ژیان و گیانێ خستیەسە خەتەر. وە پەی ئاخرین قسەی باوگێ وەگەرد شەبەکەی ماف بەشەر کوردستان، وە مدوو ویرۆس کۆرۆنا، سویەکان زەینەب تویش گیچەڵ بیە و لە رەوشێگ قورس ئەمنیەتی هەناریاسە نەخوەشخانە.
هەر وە ئی مدووە ئیمە وە جوور ژمارێگ لە چالاکەیل ژن، سیاسی، مەدەنی و کەسایەتی رووژهەڵات کوردستان ئەڕا پشتیوانی لە زەینەب جەڵاڵیان و گشت زندانیەیل سیاسی، ئی کەمپەینە ئێلام کەیمن، لە ئێرداوە داوا لە گشت ناوەندەیل ماف بەشەر لە جەهان، چالاکەیل سیاسی و مەدەنی، ژنەیل و گشت ئازادیخوازەیل کەیم ئەڕا خاونداری لە چارەنویس زەینەب جەڵاڵیان و گشت زندانیەیل سیاسی پشتیوانی لە کەمپەین ئازادی ئەڕا زینەب جەڵاڵیان بکەن.
داخوازیەیل کەمپەینەگە:
١- داوای ئازاد کردن فەوری زەینەب جەڵاڵیان کەیم
٢- وە لە وەرچەو گردن قەیران کۆرۆنا و تویش کردن زەینەب جەڵاڵیان و ژمارێگ لە زندانیەیل سیاسی تر وە ویرۆس کۆرۆنا، لازمە زەخت و فشار بخریەتە سەر دەسەڵاتدارەیل ئێران ئەڕا ئەوەیگە پایبەند بن وە مافەیل مرۆڤ، کۆنوانسیونەیل و جاڕنامەیل ناودەوڵەتی ئەڕا پارێزین گیان زندانیەیل
٣- ئی کەمپەینە داوا لە ئەمنستی ئینترناشناڵ، نەتەوەیل یەکگردێ، پارلمان ئروپا و وڵاتەیل، ناوەندەیل ماف مرۆڤ لە جەهان، ئێران و کوردستان و هاووەخت گشت چالاکەیل سیاسی، مەدەنی و خەوەرڕەسانیەگان کەید ئەڕا ئازادی زەینەب جەڵاڵیان فشار و زەخت بخەنە سەر کۆمار ئسلامی ئێران
٤- کەمپەین، داوای هاوکاری و پشتگیری ئەڕا وەڕێوەبردن ئەو چالاکیەیلە ک دیاری کریاس، کەید. چالاکی مەیدانی ئەڕا ئازادی زەینەب جەڵاڵیان لە وڵاتەیل لە وەردەم سەفارەت ئێران و ناوەندەیل گرێدریاگ.
٥- هەر کەس توانێ نویسین، وێنە یا ویدئو پەیام پشتگیری ئەڕا ئی کەمپەینە بنێریەت
٦- کەمپەین داوا کەید مافنامەی دیجیتاڵی ئەڕا ئازادی زەینەب جەڵاڵیان ئمزا بکەن. ئی مافنامە ئەڕا ئەمنستی ئینترناشناڵ، نەتەوەیل یەکگردێ، پارلمان ئروپا، وڵاتەیل و ناوەندەیل ماف مرۆڤ هەنێریەد.
“کەمپەین ئازادی ئەڕا زەینەب جەڵاڵیان”
#FreedomForZeynabJalalian
:E-Mail
freedomforzeynabjalalian@gmail.com
https://m.facebook.com/Freedom-For-Zeynab-Jalalian-100533868370269/?ref=bookmarks
https://www.instagram.com/freedomforzeynabjalaliann?r=nametag
