سێوەمین کۆنگرەی کۆدار؛ وە ڕووحیەێ شووڕشگەرانەێ خەڵقەیل، کوومەڵگامان ڕێکخستن کەیم و کوردستان ئازادەو کەیمن

وە ڕووحیەێ شووڕشگەرانەێ خەڵقەیل، کوومەڵگامان ڕێکخستن کەیم و کوردستان ئازادەو کەیمن

سێوەمین کۆنگرەێ کۆدار لە ڕووژەیل ٧، ٨ و ٩ مانگ مەی ٢٠٢٠، هاووەخت وە ١٧، ١٨ و ١٩ ئۆردیبهێشت ١٣٩٩ و وە شۆعار “وە ڕووحیەێ شووڕشگەرانەێ خەڵقەیل، کوومەڵگامان ڕێکخستن کەیم و کوردستان ئازادەو کەیمن” وە سەرکەتن وەڕێیەوچی. کۆنگرەێ کۆدار لە کۊەسانەیل کوردستان وە ڕێیەوچی و لەناوی لە تێکووشانەیل ئازادیخوازانەێ خەڵق کورد و شەهیدەیل ڕێگاێ ئازادی، وە تایوەت پێشەنگەیل شەهیدی جوور ئارگەش کارزان، تۆلهەڵدان سنە، ڕۆژهات بووکان، دلۆڤان سەردەشت و هەلەێوا ئقباڵ مورادی قەێرزانی کریا و هۊرمانیان بەرز ڕاگیریا. کۆنگرەگە وە بەشداریکردن ئەندامەیل و نوانەرەیل دامەزریاگەیل و کۆمیتەیل کۆدار وە ماوەێ سێ ڕووژ درێژە داشت. کۆنگرەگە چالاکی خوەی وە وارەسی کردن و باس لە کارکرد سێ ساڵ وەرین و چۊنیەتی وەڕێیەوچین چالاکی ناوەێن دۊ کۆنگرە دەسپێ کرد. لەی پێناوە، وە بنەماێ ئامووجارییەیل سەرووک ئاپۆ و شیکارییەیلی لە باوەت مدێرنیتەێ دمۆکراتیک، دەمەتەقێیەیل پڕبایەخ و سازانەرێگ ئەنجام گیریا. هەلەێوا کۆنگرەگە وەگەرد خوەڕەخنەگرتن لە وەراێوەر خەڵقەگەمان لە باوەت ئوون و ئووبایل، وە ئامانج ئەوزێنە کردن و وەهەرازبردن ئاست تێکووشاێن و چالاکییەیل، بەرنامەێ خەبات ئەڕاێ بانان پێشکەش کرد. چالاکی دامەزریاگەیل و کۆمیتەیل و کار و خەباتیان لە ڕەوەن وازنووڕسن شیکاری کریا و ئەڕاێ کاراتربۊن چالاکییەیل کردەوەیلێگ ئەڕاێ ئەوڕێکخستن و سوودمەنتر کردن کۆمیتەگان وە ئەنجام ڕەسی. کۆنگرە شەوراێ وەڕێیەوبەری کۆدار ک لە ١٨ کەس وە دی تیەێد هەڵوژان و ئەرک هاوسەرووکی کۆدار وە فرەێنەێ ڕایەگان، نریا وە مل شان هەڤال فواد بریتان و هەڤال گوڵان فەهیم.

وەڕێیەوبردن کۆنگرە لە ڕووژەیل وەڕەو ١٩ گوڵان (ئۆردیبهێشت) ماناێ تایبەتێگ دێرێ و پەیمان و سەوەن ئێمە وەگەرد شەهیدەیل واوەسەێ زندان، فەرزاد کەمانگەر، فەرهاد وەکیلی، عەلی حەیدەریان، شیرین عەلەم هوولی و گشت شەهیدەیل ئەی ئارا دووارە کەێدەو. کۆنگرەگە وەگەرد ڕێزگرتن یاێ و هۊرمان ئەی شەهیدەیلە، وە مل درێژەداێن وە ڕێیەگەێ ئەوانە جەخت کەێد و ئەرزشتەیلێگ ک وە دەس ئەوانە ئافرانیاس چۊ بنەماێ لە وەر چەو گرێد ئەڕاێ سازین کوومەڵگاێگ دمۆکراتیک و ئازاد. کۆنگرەگە بارودووخ زندانییەیل سیاسی لە ئێران و ڕووژهەڵات کوردستان خستە وەر دەمەتەقێ و پەڕەپێداێن وە فەرهەنگ واوەسەێ زندان چۊ مەرج سەرەکی ئەڕاێ پاراستن ئەی سەنگەرە زانست. هەوەجە وە پێ هەس ک لە پێناو ڕووحیەێ یاریکەری و هاوکاری کوومەڵایەتی گشت تۊژەیل کوومەڵگا لە باوەت پێشتگیری کردن و وەرگری لە زندانیەیل سیاسی و بنەماڵەگانیان بەرپرس بوون و وەی شێوە شەڕ هەمیشەیی لە وەراێوەر کوومەڵگا وە شکست بکیشنن. لەی کۆنگرە وە جەخت کردن وە یەکیەتی و هامگرتن لە دەور ئەرزشتەیل، دەسکەفتەیل و ژاژەیل کوومەڵایەتی و داوەت گرتن لە گشت ئەڕاێ ئەوزێنەکردن و نەهادین کردن ئەی خەزانەێ پڕبایەخ کوومەڵایەتیە، یاێ شەهیدەیل ژینگەپارێز لە ڕووژهەڵات کوردستان شەریف باجوور و هاوڕێانی، شەهیدەیل سەرهەڵداێن مانگ ئابان و شەهیدەیل تەندروستی کوومەڵگا لە تێکووشاێن دژ وە کۆرۆنا یانێ کادرەیل و کارمەنەیل گیانباختکریاێ لە ناخوەشخانەیل بەرز ڕاگیریا.
کۆنگرەگە بارودووخ سیاسی لە ئاست ناونەتەوەیی و ناوچەیی وارەسی کرد و ڕۊداوەیل قوومیاێ لە خوەرهەڵات ناوەڕاس لە دیمەنێگ پارادایمی و لە بارەیل جووراوجوور شیەو کرد. وەی بنەما، لە بارودووخێگ ک ناوچەگە بۊەسە ئاراێ شەڕ جهانی سێوەم و نزام نئۆلیبرال جهانی دەورەێ نووێگ لە ئێستێعمار لە ناوچەگە و جهان خستیەسە ڕێ، خوەرهەڵات ناوەڕاس تۊش گووڕانکاریەیل گورج و گشت لایەنەێگ بۊە. بارودووخ ئیرەنگەیی لە بار سیاسی و نزامی فرە هامتاێ دەورەێ شەڕ جهانی یەکەمە ک لەو بارودووخە نزام جهانی وە شوون داڕشتن نەزم دەوڵەت-نەتەوە چۊ جێگەگیر نزامەیل ئمپراتووری بۊە. ئەمانگ لە دەورەێ ئیرەنگەیی، نزام جهانی هەر ئەو هندسەێ جارانە چۊ پێشگرێ ئەڕاێ ڕەسین وە قازاشتەیل دەسداگریخوازانە و پەڕەداێن وە نزام بازار ئازاد و گەردیان سەرمایە زانێد. هەر وەی مدووە خوەرهەڵات ناوەڕاس ک بۊەسە گووڕستانێگ ئەڕاێ پرۆژەیل دەوڵەتەیل خوەرئاوا و هەمراێ دێرێ واوەسە کەێدن، ئەڕاێ یەی کەڕەت تر تۊش ئاژاوە کردیە. ئەگەرچە شەڕەیل وەجێگرایەتی یا ڕاساێراس هازەیل و کوشیاێن ئنسانەیل و لەناو چین ژێرخانەیل بۊن و ژیان خەڵقەیل لە شوون خوەیا هاوردیە، وەلێ مۆدلێگ سەرکەفتی و گشتگیر ئەڕاێ چارەسەکردن کێشەگان نەهاتیەسە دی. شیاێ باسە کە نزامەیل حکوومەتی ناوچەیی وە ماوەیل فرە وەرین تۊش بێ جم و جووڵی بۊنە و کارامەێی خوەیان لە دەست دانەسەوە. بایەد لە وەر چەو بگریمن ک ئەی نزامەیلە دەسکرد هەر ئەو نزام جهانین و وە هۊچ شێوەێگ لە لایەن خەڵقەیل ناوچەگە پەسەن نەکریانەسەوە. هازەیل ناوچەیی و جهانی هانە شوون یە ک لە ئێعترازەیل و تێکووشانەیل خەڵقەیل وە قازاشت خوەیان ئسفادە بکەن و ئەڕاێ خەڵەتانن داواێ پێشتیوانی و پێشتگیری لە ئەوانە بکەن. هەر لەو کات، حکوومەتەیل ناوچەگەیش هەر ئەو داواکاریەیلە وە شێوەێگ تر کەن و داواێ وەرگری کردن لە بۊن و کیان سیاسی و کوومەڵایەتی مەردمەگەیان لە وەر هێرشتەیل خوەرئاوا دێرن. لەی ناوەێنە جێ چووڵ پرۆژەێگ ک خوازیارییەیل و ئاوەختییەیل خەڵقەیل لە خوەی بگرێد دیارە و هەست کریەێد.
کۆنگرە وە سەر ئیە ک ئەی بارودووخە لە باوەت ڕەژیم دیکتاتۆری ئێرانیش دروسە، وەی باوەرە ک، ئەی نزامە وە دۊاێ چل ساڵی ک لە بۊن ناکارامەێی ویەریەێد، وە شکل گشت لایەنە لە بوارەیل گوفتمانی، ساختاری، ڕێکخریاگی، وەڕێیەوبەری، سیاسەت ئراناێن و وەدی هاوردن لە بارودووخ پیری و وەساڵاچوویی کەفتیە. نزام لە گشت ئارایل لە شوعارگەرایی تۊش خەسار بۊە و هەوەجە وە گووڕانکاری فرەتر لە هەمیشە خوەی نیشان دەێد. وە دی هاتن چینەیل کوومەڵایەتی نوو و لەناوچین بڕێگ لە چینەیل کۊەنە جوور چین ناوەڕاس سونەتی، شەقەیل کوومەڵایەتی نوو و پانتری وە دی هاوردیە. فاسلەێ چینایەتی تۊژەیل خەسارهەڵگر و تۊژەیل بەهرەمەن لە رانت و ئمتیاز هەر ڕووژ فرەترەو بوود و دۊنیمن ک خەڵق و حکوومەت وە شێوەێگ گشت لایەنە لەیەکەوە جیا بوون. چینەیل نووێ کوومەڵایەتی ک لە گووڕانکاری لە شێوەێ ژیان و ئەوزێنەکردن ئاست خوەندەوەری و دەرس خوەندن و پەیوەندییەیل نووێ جهانی و پێشکەفتن تێکنۆلۆژی وە دی هاتنە، خوازیارییەیل جووراوجوورێگ لە پانتایی کوومەڵگا دروس کردنە ک شەقەیل وە دی هاتی لە ساختار هاز لە ئێران لە ئەی نزیکیەیلە ئاشکرا کەێد. ئەگەرچە نەبۊن گوفتمانێگ زاڵ و ڕێبەریێگ یەکگرتی و یەکتا لەناو دژبەرەیل ڕەژیم، پەراوێز ئەمنێگ ئەڕای نزام ئێران دروس کردیە، ئەمانگ بەردەوام بۊن ڕەوەن ئیرەنگەیی تەنانەت لەی بارودووخیش ئەڕاێ نزام لە هەمیشە سەخت تر و دژوارتر بۊە.
جمشت ئاپۆیی وە ئەوڕەسین وە ئەی ڕاسی و وە بەهرەمەن بۊن لە هۊرشە و فەلسەفەێ ڕێبەر ئاپۆ، هێڵ سێوەم خەبات و ڕێکخستن هەڵوژانیە ک وە ماناێ جێگرتن لە وەرەێ خەڵق و دۊری کردن لە قوتبەیل دەسەڵات و هاز چۊ ئستراتێژییە. وە ئەی مەبەستە وە پێشخستن فۆرم نووێگ لە ڕێکخستن کوومەڵایەتی و فەرهەنگی وە بنەماێ گشتی زێهنیەت خوەرهەڵات ناوەڕاس و وە بنەماگرتن وەگەرد یەک ژیاێن خەڵقەیل، و هەلەێوا وە بنەماێ هێڵ واوەسەێ دیرووکی لە چوارچێوەێ کۆنفدرالیزم دمۆکراتیک خەڵقەیل، نوانەرایەتی هێڵ سێوەم وە خەسپەن خوەی زانێدن. ڕێکخستن کۆداریش وە بەهرەمەن بۊن لە ئەی زانست و عەقل سیاسی و کوومەڵایەتی ئەڕاێ چارەسەرکردن کێشەیل کووکریاێ لە ڕووژهەڵات کوردستان پا ناسە ناو ڕێگاێ خەبات. کۆدار وە شی کردن گشت لایەنەێ بارودووخ ڕووژهەڵات کوردستان و ئاگادار بۊن لە هەوەجەیل و خوازیارییەیل دیرووکی و نووێگ ک لە بارودووخ نووێ کوومەڵایەتی، سیاسی و فەرهەنگی سەرچەم گرتیە، پێداگرانە دەس وە خەبات و تێکووشاێن داس. لەی پێناوە خەڵقمان لە ڕووژهەڵات کوردستان ڕێکخستن کەیمن ک گشت جیاوازییەگان لە خوە گرێدن. کوومەڵگاێ دمۆکراتیک و ئازاد ڕووژهەڵات کوردستان وە خەباتێگ وە تێکووشاێن بەردەوام و گشت لایەنە هەوڵ دەێد تا کۆنفدرالیزم دمۆکراتیک و نەتەوەێ دمۆکراتیک لە ڕووژهەڵات کوردستان و ئێران بوودە گۆفتمانێگ سەرەکی. شکێ نییە ک ئەی مۆدلە لە ژێر هەڵاماتەیل گشت لایەنەیل هازەیل جهانی و ناوچەیی کارامەێی و توانایی خوەی لە دژوارترین بارودووخەیل نیشان داس و توانێد زەمینە ئەڕاێ ئاشتی هەمیشەیی لە ناو جیاوازییەگان خوەرهەڵات ناوەڕاس، ئێران و وەتایوەت ڕووژهەڵات کوردستان خوەش بکەێدن.
سێوەمین کۆنگرەێ کۆدار وەی شیکاریە ئەڕاێ وەدەسهاوردن ئامانجەیل و ئارمانەیل خەڵقمان خاڵەیل ژێر پێشکەش کەێد:
١- کۆدار ئەڕاێ داشکانن سیاسەت گۆشەگیرکردن زوورەکی وە ڕێبەر ئاپۆ و ئازادبۊنی لە بەندیخانە چۊ دامەزرانەر نزام کۆنفدرالیزم دمۆکراتیک، خوەی وە بەرپرس زانێد و گشت توان ڕێکخستن و پراکتیکی خوەی لەی پێناوە وە کار بەێد. هاوکات وە ئەی هەوڵەیلە ئەڕاێ ڕەواج داێن و نەهادین کردن هۊرشەگان ڕێبەر ئاپۆ لە ڕووژهەڵات کوردستان و ئێران چالاکییەیل خوەی وەروەلاترەو کەێد.
٢- کۆدار وە ویەردن لە نزام دەوڵەت-نەتەوە لە ئاست ئێران و ڕووژهەڵات کوردستان ئەڕاێ جێگرکردن نزام کۆنفدرالیزم دمۆکراتیک خەڵقەیل لە درێژەێ هەوڵەیل پێشین، دەس وە گەشەکردن چالاکییەیلی لە زەمینەێ خوەوەڕێیەوبردن لە گشت ئارایل کوومەڵایەتی کەێد. خوەی لە باوەت ڕێکخستن گشت کەسەیل و تۊژەیل کوومەڵگا وە شێوەێ تایوەت ئەڕاێ پاراستن ئەرزشتەیل و دەسکەفتەیلیان وە بەرپرس زانێد. دامەزراندن وەرەێ دمۆکراتیک خەڵقەیل ئێران لە پێناو گەشەکردن پەیوەندییەیل سیاسی و کوومەڵایەتی وەگەرد خەڵقەیل بەلووچ، ئازەری، تورکەمەنەیل و نەتەوەیل ترەک و هازەیل دمۆکراتیک وە کار سەرەکی خوەی زانێد.
٣- کۆدار ئەڕاێ دامەزراندن ژیان هاوبەش ئازاد، دژ وە هەر جوورێگ لە ڕەگەزپارێزی کوومەڵایەتی، سونەتەیل پاشکەفتنخوازانە و قانوونەیل پیاسالار ک ژنەیل خەێدە ژێر بەهرەکیشی خەبات کەێد. وەی مەبەستە لە نزام خوەوەڕێیەوبردن، بەشداری کردن یەکسان و چالاکانەێ ژنەیل وە بنەما گرێدن.
٤- کۆدار وە ئەوڕەسین ئەی خاڵە، ک لەناو چین زوان و فەرهەنگ زەمینە ئەڕاێ لەناو چین خەڵقەیل خوەش کەێد، هەوڵ خوەی دەێد تا زەمینە ئەڕاێ ئەوزێنەکردن و گەشە بۊن و پەیوەندی فەرهەنگی لە ناو جیاوازییەیل ڕووژهەڵات و ئێران ئامادە بکەێد تا ئاڵشت و گووڕینەیل فەرهەنگی سازانەر لە ناوەێن کوومەڵگایل وە دی باێد.
٥- ئایین و باوەرداشتەیل هەر کوومەڵگاێگ هەسۊن سەرەکی دنیاێ مەعنەوی ئەو کوومەڵگان و لازمە ک ئەڕاێ سەڵامەت ڕووحی و دەروونی بپارێزیەن. دین و باوەرداشتەیل کوومەڵگا هەمیشە لە لایەن هاز سیاسی چۊ ئامێرێگ ئەڕاێ ڕەوایی داێن و ئستسمار ئەو کار گیریاس. کۆدار هەر جوور لە زێهنیەت ک دین و باوەرداشتەیل چۊ ئامێرێگ ئەڕاێ وە دەس هاوردن هاز وە پیسەکاری وە کار گرێد، دژ وە ئەی کەژڕەویەیلە خەبات کەێد و خوازیار لە پاڵ یەک نیشانن دینەیل و باوەرداشتەیل و خوەش کردن زەمینەێ وە یەک ڕەسین و دەمەتەقێ لە نێوانیانە.
٦- وە ئەی شۆعارە ک «هۊچ جەوانێگ نەبایەد لە پەروەردە و ڕێکخستن دۊر بمینێد»، گشت داوەت کەیم وە ڕۆل جەوانەیل لە پێشەنگی خەباتەیل خەڵقی ئێسفا بگرن. ڕۆل ئەوان لە ئەوزێنەکردن، گەشە بۊن و لەنووئافراندن کوومەڵگا و پێشکەفتنی بەرجەستە کەیمن، ک دەرفەت و فەزاێ چالاکی لازم ئەڕاێ بەشداریکردن گشت لایانەیان وە دی تیەرێد.
٧- نزام دیکتاتۆر ئێران لە مادەیل موخەدێر، لەشفرووشی، بەسیج، بێکاری و … چۊ ئامێر شەڕ تایوەت ئسفادە کەێد. کۆدار ئەڕاێ خەبات وەگەرد ئەی بارودووخ و ئەڕاێ ڕەسین وە کوومەڵگاێگ ساغ و ساڵم وە ڕێکخستن کوومەڵگا وە شێوەێ خوەوەڕێیەوبەر ناهیلێت سەرمایەیل ئنسانی وە بەتاڵەو بوون.
٨- سیاسەتەیل نئۆلیبرال لە ئێران و ڕووژهەڵات کوردستان وە کارەسات بێکاری گشتی ئەنجامیە و هەر ڕووژ تۊژەیل خەسارهەڵگر چۊ کوولبەرەیل قوروانی خوەی کەێد. کۆدار ئقتساد کوومەڵایەتی وە بنەما گرێد و هەوڵ دەێد تا ئاراێ ئقتساد لە ئنحسار هاز بارێدە دەیشت. لەی پێناوە وە پۆتانسیێلەیل بنەکی ڕووژهەڵات کوردستان ئێسفا کەێد و سوڕە تا ئەڕاێ وەدی هاوردن ئقتساد کوومەڵایەتی ڕێکخستن بکەێد.
٩- کۆدار کارەسات ئکۆلۆژیک لە ڕووژهەڵات کوردستان و ئێران دەرک کردیە و ئەڕاێ ڕێکخستن و یەکانگر کردن کوومەڵگاێ ئنسانی و سرشت وە بنەماێ کوومەڵگاێگ ژینگەیی هەوڵ دەێد و دژ وە سیاسەتەیل دژەژینگەیی حکوومەت ئێران ک زاگروس و زاگروس نشینەیل لە ناو بەێد خەبات کەێد. لە پێناو وەروەلا کردن و نەهادین کردن فەرهەنگ وڵاتپارێزی و پەیوەندی دوارەێ ئنسان و ژینگە، هەلەێوا پاراستن ڕەنجەیل شەهیدەیل و تێکووشەرەیل ئەی ئارا، ساڵڕووژ شەهیدبۊن «شەریف باجوەر» و هاوڕێانی(٣ی خەرمانان) چۊ ڕووژ پاراستن ژینگە لە ڕووژهەڵات کوردستان و ئێران ئێعلام کەیمن.
١٠- کۆدار وەرگریکردن لە ئەرزشتەیل کوومەڵایەتی و ئنسانی وە خەسپەن هەر تاکەکەس لە کوومەڵگا زانێد و دۊر لە نووڕینگەێ ئەرتەش سالاری، وە سەر ئەی باوەرەسە ک لازمە کوومەڵگا وە شێوەێ خوەبەخشانە و لە چوارچێوەێ سەروەخوە و تایبەت، خوەی ئەڕای هەر جوور هەڵامات و دەسدرێژی ئامادە بکەێد، کۆدار لەی پێناو پەروەردە کردن کوومەڵگا وە بنەما گرێدن.
١١- کۆدار ئەڕاێ ئسفادە کردن لە گشت دەرفەتەیل و ئمکانەیل لە ڕووژهەڵات کوردستان وە مەبەست وە دی هاوردن نزام خوەوەڕێیەوبەری، ئامادەس تا وەگەرد گشت حزبەیل ئازادیخواز و جەریانەیل مەدەنی و سیاسی لە ئەی پارچە لە کوردستان هاوکاری بکەێد. لە ئەی باوەتە ئێمە چیمنە پیری هەر جوور هاوکاری، و زەمینە ئەڕاێ ئەی پەیوەندیە ئامادە کەیمن.
کۆدار لە پێناو وە دی هاوردن کوومەڵگاێگ دمۆکراتیک و ئازاد، وە توان، هاز و مەعنەویاتێگ ک لەی کۆنگرە وە دەس هاوردیە ئەڕاێ فرەترکردن و گەشە کردن گشت لایەنەێ هاوژینی خەڵقەیل و جیاوازییەیل کوومەڵایەتی ڕووژهەڵات کوردستان درێژە وە خەبات خوەی دەێد. یەی کەڕەت ترەک هاوکات لە ڕەخنەگرتن لە خوەمان لە باوەت گشت کەموکوڕییەل و لاوازییەیل لە وەراێوەر خەڵقمان، هەوڵ دەیم تا سقامدارتر، چالاکتر و بێ هەڵەتر لە پێناو دامەزراندن خوەوەڕێیەوبردن دمۆکراتیک هەنگاو بنەیمن. وەڕێیەوبردن سەرکەفتی کۆنگرەگە وە ڕێبەر ئاپۆ، شەهیدەیل ڕێگاێ ئازادی، زندانییەیل سیاسی، بنەماڵەیل شەهیدەیل و خەڵق وڵاتپارێزمان و گشت ئازادیخوازەیل و حەقیقەت دووسەیل پیرووزبایی کەیمن. هەلەێوا ئەڕاێ دامەزراندن نزام خوەوەڕێیەوبردن چۊ سیستم کوومەڵایەتی و سیاسیێگ ک نیاز سەرەکی و وەڕووژە، لە گشت جیاوازییەیل و جەریانەیل و ڕێکخریاگەیل مەردمی و نوانەرەیل تێکووشەر و چالاک موعەلمەیل، بازاڕییەیل، ژنەیل، جەوانەیل، خاوەن ئەزموونەیل کوومەڵایەتی و فەرهەنگی، ڕێبەرەیل ئایینی، وەکیلەیل و مافپارێزەیل، چالاکەیل ماف ئنسان، هنەرمەندەیل، ڕووشنهۊرەیل و گشت کەسانێگ ک دڵەڕاوکی ئەڕاێ جهانێگ خاستر و ژیانێگ ساڵم و ئاشتیخوازانەتر دێرن داوەت وە خەبات هاوبەش کەیمن.

بژیەێ ڕێبەر ئاپۆ
بژیەێ یەکێتی دمۆکراتیک خەڵقەیل
بژیەێ یەکسانی، ئازادی و دمۆکراسی

سڵام و ڕێز شووڕشگەرانە
١٧/٠٨/٢٠٢٠
کوومەڵگاێ دمۆکراتیک و ئازاد رووژهەڵات کوردستان- کۆدار