دەستەی وەڕێوەبەری پلاتفۆرم یارسان: لە دۊای دەیان ساڵ تێکووشان ئەڕا کوومەڵگە و باوەری یاری کاک سام تەبریزیان دوون نوو هەڵوژان
لە دۊای دەیان ساڵ تێکووشان ئەڕا کوومەڵگە و باوەری یاری کاک سام تەبریزیان دوون نوو هەڵوژان
لە ناو رووژەیل وەرین خەوەردار بیمن ک باوەردار و تێکووشەر کوومەڵگەی یارسان سام تەبریزیان خەڵک شار کرن ژیانێ لە ئی دوونە کوتایی هاتیە و چیەسە ناو جامەی نوو و تێکووشان بێ وچانێ لە ئی دوونە ئەڕا جەم کردن و نۊسان کەڵامەیل کوومەڵگەی یارسان وە پەرتەخ رەسیە.
کاک سام یەکێگ لە باوەردارەیلێگ بی ک تەنانەت تێکووشان ئەڕا جەم کردن کەڵامەیل کوومەڵگەی یارسان و باوەری یاری ئەڕای گرنگتر و گووش لە گیچەڵەیل ژیانێ نەیا، دەیان ساڵ لە ژیانێ تەرخان کردۊوی ئەڕا باوەری و کوومەڵگە، ئی تێکووشان و تەقەلایەیلە وە لەونێگ بی ک شوون و جێگ وە ئەرزش و ئحترام ئەڕای لە ناو کوومەڵگە دورس کردۊوی و کردیەسەی کەسێگ مەردمی. یەکێگ لە گرنگترین کارەگانێ ک یەکم جار لە دیرووک کوومەڵگەی یارسان بێ ئەنجام گرد، جەم کردن و جێ دایێن کەلامەیل یارسان لە دەورەیل بالۊل، شا خوشین، باوە سەرهەنگ، باوەجەلیل، باوەناوس و پردیوەر وە ناو کتاو “مجمع الکلام سرانجام اهل حق” بی.
ئیمە وە جوور پلاتفۆرم یارسان دوون نوو کاک سام تەبریزیان پیرووز ئۊشیمن و همێد سلامەتی ئەڕا کەسوکارێ خوازیم، همێدواریمیش ک گشت کەسەیل ناو کوومەڵگەی یارسان وە تایوەت جوانەیل و ژنەیل، ژیان و تێکووشان کاک سام وە ئلگو بگرن و ڕێ ئەو هەڵوژنن.
دەستەی وەڕێوەبەری پلاتفۆرم یارسان
